Trintxerpeko hustutako eraikineko 20 familiak aste honetan bueltatuko dira etxera
Hilaren hasieran etxetik irtenarazitako Jaizkibel kaleko bizilagunak aste honetan euren etxeetara bueltatu ahal izango dira, lanak aurreikusi bezala badoaz.
Hasi dira lanak eraikinaren beheko supermerkatuan. 
Pasaiako Udaltzaingoak iragarri duenez, pasa den ostiral goizean hasi ziren habetze lanak etxebizitzen behean dagoen supermerkatuan. Establezimendua hustu eta lanak oinarritik hastea izango da lehen pausoa, bizilagunak etxera segurtasun osoz buelta daitezen bermatu ahal izateko. Udaltzainen arabera, “aste bukaeran, ere, jo eta ke” ibili dira langileak lokalean, segurtasun lanetan.
Obrek aurreikusitako erritmoa jarraitzen badute, eta azken momentuko ezustekorik agertu ezean, bizilagunak aste honetan bertan bueltatu ahal izango dira euren etxeetara. Bien bitartean, eta tekniko arduradunek hala iragarri arte, senide edo lagunen etxeetan bizitzen jarraitu beharko dute pasaitarrek, azken asteetan egin behar izan duten moduan.
Ia bi aste igaro dira Jaizkibel kaleko 9 eta 11 atarietan bizi diren hogei familiak euren etxeetatik irtenarazi zituztenetik, beheko supermerkatuan atzeman ziren pitzadura batzuek eraikinaren egonkortasuna zalantzan jarri zutenean. Ordutik, udaltzaingoaren patruila bat egon da 24 orduz eraikinera sarbidea kontrolatzen.
