Pasaiako umorezko antzerkiak bide erdia egin du
Asteburu honetan izan diren Umorezko Antzerki Jardunaldien lehen hiru ekitaldiei harrera beroa egin diete pasaitarrek. Datorren asteburuan izango dira azkenak.
Mila Espiga eta Belen Cruzen 'Anarkia Relacional' antzezlana. 
Joan den asteburu honetan, 16tik 18ra, Pasaiako Umorezko Antzerki Jardunaldien 39. edizioko ekitaldiak egin dituzte, udalerriko barruti ezberdinetan. Artekaleren eskutik ‘Kaleluia’ jardunaldiak, ‘Tomaxen abenturak’ Trintxerpeko txikientzat, Zanguangoren arrakasta Antxon, eta Guillem Albaren ‘Kalma’ ikuskizun goxoa Donibanen, azkenik.
Dena den, antzerkiak bide erdia besterik ez du egin oraindik. Datorren asteburuan amaiera borobila emango diote orotariko artistek aurtengo edizioari, honako antzezlan hauekin:
- ATX teatroa. ‘Zazpiak bat’. Hilaren 23an Udal aretoan (San Pedro), 19:00etan.
- Aurtengo Donostiako Antzerki Saria eskuratu du piezak, epaimahaiak nabarmenduz “antzerki lengoaia bikaina” duela. Komeria, satira eta sarkasmoa konbinatuz, guztiok alfonbra azpian ezkutatu ohi duguna agerian geratuko da obra honekin. Nondik dator gizakiaren gaiztakeria? Berezkoa da? Bekatuen ideiarekin gizaki berri bati bizia emango zaio.
- Sarrerak hemen klik eginez eros daitezke.
- Prezioa: 10,73 euro.
- Markeliñe. ‘Kartoibiraka’. Hilaren 24ean Juanba Berasategin (Donibane), 19:00etan.
- Ikuskizun Hoberena, FETEN; eta Haurrentzako Ikuskizun Hoberenaren MAX saria. Biltegitik irten gabe, globoz, itsasontziz edo gameluz, istorio honetako protagonistek munduari bira emango diote 80 kaxatan. Julio Verneren ‘Munduari bira 80 egunetan’ eleberrian oinarrituta, jolasari esker irudimenezko bidaia zoragarri bat hasteko prest daude protagonistak.
- Antzezlanaren bideoa esteka honetan ikus daiteke.
- Sarrerak eskuratzeko, egin klik hemen.
- Prezioa: 3,22 euro.
- Mila Espiga eta Belen Cruz. ‘Anarkia Relacional’. Hilaren 25ean Kultur Etxean (Antxo), 18:30ean.
- 2020ko Donostiako Poltsiko Antzerki saria jaso duen ikuskizuna. Polbo eta hautsa ez da gauza bera, armairuak, bolloak, larrua jo edo txortan egin, eta sexua… edo sexu-eza. Izan ere, orain hitz egiterik badagoela… hitz egin dezagun. Beste garai bateko bi emakume, opilgintza tradizionalean jantziak, ‘Puro bollo’ festibalera doaz…
- Sinopsi osoa irakurri eta sarrerak eskura daitezke, hemen.
- Laburpen bideo bat ere dago ikusgai.
- Prezioa: 8,58 euro.
Erlazionatutako edukiaKaleluia formakuntza, arteetako profesionalei begiraAntzerkia eta algara, oholtzan“Garai hauetan bereziki beharrezkoa da haurrekin eta helduekin elkarguneak sustatzea”39 urte beteko ditu aurten Pasaiako Umorezko Antzerkiak
