Hustutako eraikineko bizilagunek 136.000 euro ordaindu beharko dituzte
Habetze lanen aurrekontua etxetik aterarazitako 20 familiek, inguruko beste bizilagunek nahiz behealdeko lokalen jabeek ordaindu beharko dute. Oraindik falta dira obra gehiago.
Jaizkibel kaleko 9. ataria, habetze lanak egin ostean. 
Asteartean bildu ziren lehen aldiz Jaizkibel kaleko bizilagunak, hilabete hasieran bi atariak hustu zituztenetik eraikinean atzemandako hainbat pitzadurek etxebizitzen segurtasuna zalantzan jarri zutenean. Herriko frontoian egindako bilkura hartan administratzaileak iragarri zien orain arte egindako habetze lanen aurrekontua 136.000 eurokoa dela, eta bizilagunek aurreratu beharko dutela kopuru hori aste honen eta hurrengoaren bitartean.
Zuzenean ez kaltetutakoek ere ordainduko dute
Zuzenean kaltetutako 9. eta 11. zenbakiez gain (horiek dira hamabost egunez hustu zituztenak), behealdean edo inguruan dauden lokalek ere ordaindu beharko dituzte habetze lanak, bakoitzak dagokion portzentaian.
Horiekin batera, badira zuzenean nahiz zeharka inplikatuta dauden Jaizkibel kaleko beste hainbat etxebizitza ere, haien artean 7 eta 13 zenbakiak; azken horietan bizi direnek ere egin beharko diote aurre zehaztutako kopuruaren ordainketari, nahiz eta etxebizitza horietan ez da printzipioz pitzadurarik atzeman, izan ere, behealdean dagoen supermerkatuak (zuzenean kaltetutakoa) eraikinaren oinarria hartzen du.
Mauri Gonzalezen gurasoak hutsarazitako atarietako batean bizi dira, eta hori gutxi balitz, semea kale berean dagoen lokal baten jabe da, hortaz, familiak “zorte bikoitza” izan du. “Negar ez egiteagatik egiten dut barre”, adierazi dio Gonzalezek Hitzari.
Habetze lanen kostuari aurre egiteko hurrengo astera arteko epea dute bizilagunek, “gero ikusi beharko dugu ea aseguruek kalteen ardura euren gain hartzen ote duten, baina oraingoz behintzat partikularrek gure poltsikoetatik egin behar dugu ordainketa”, penatu da Mauri. Dena den, bizilagunak erantzunbeharrez egingo dio aurre egoerari: “Orain arteko habetze lanak Bilboko enpresa batek egin ditu era langile horiei ere ordaindu behar zaie”.
“Okerrena ez da nirea”, jarraitu du, “nik ez dut gehiegi ordaindu behar izango, baina gurasoek, ordea, bai”. Eurak 9. atarian bizi dira 65 eta 75 urte dituzte. Egoera honek guztiak bikoteari ezinegon handia eragin diela aitortu du semeak: “Atzo afaltzera joan nintzen ama nahiko urduri ikusi nuen. Normala da, lehenengo eraikinaren segurtasun eza eta orain dirutza hau…”.
Amesgaizto hau oraindik ez da amaitu, izan ere, oraindik hormigoi habeak eta hainbat zutabe egin behar dira segurtasuna guztiz bermatu ahal izateko. Horretarako beste aurrekontu bat egin beharko dute, orain ordaindu behar denaz aparte.
Egitura kalteen erantzukizuna
Pitzaduren arrazoia zein den inork ez daki, Gonzalezek dio inguruan badirela nabarmen zaharragoak diren eraikinak eta horrelakorik gertatu ez zaienak: “Nik uste dut zerbait arraroa dagoela guzti honen atzean, zerbait ez dela ongi egin…”.
Badira fokua behealdean dagoen supermerkatuan jartzen dutenak, orain urte batzuk bertan izan ziren hainbat lanengatik, “dena den, horiek zurrumurruak besterik ez dira, ziurtasunez ez daki inork ezer; argi dagoena da zerbait gaizki egin dela, eraikin bat ez baita erortzen egun batetik bestera pisuzko arrazoirik gabe”, horretan bat datoz bizilagunak. “Gainera”, gehitu du, “bloke bakarra izango balitz agian, baina hiru bloke dira kaltetutakoak. Hori ez da normala”.
Dena den, orain, itxoin besterik ezin dute egin: “Lehen ordainketa egin, bakoitzari dagokion neurrian, eta ikusiko dugu…” tamaldu da bizilaguna. Hurrengo bileran azalduko diete eman beharreko hurrengo pausoak zein diren, eta ea bizilagunek berriro euren etxeetatik atera beharko ote duten.
