Euskararentzat aukerak sortzen jarraitzen du Lau Haizetarak
Euskara elkarteak parte hartze prozesua egingo du euskal hiztunen komunitatearen garapenari modu eraginkorrean eta partekatuan ekiteko hausnarketa bideratzeko.
Bide berriak urratzen lagunduko dien prozesua abiatuko du Lau Haizetara Euskaltzaleen Topaguneak. Prozesu irekia izango da Lau Haizetara aukerak sortzen, eta hiru saio egingo dituzte horren barruan, hilaren 29an (osteguna) lehena, azaroaren 12an bigarrena, eta abenduaren 4an azkena. Guztiak 18:00etatik 20:00etara izango dira Merkatuzar aretoan segurtasun eta osasun neurriak bermatuta.
1992. urtean Lau Haizetara elkartea sortu zenetik, gizarteak fenomeno globalen eragina izan duela nabarmendu dute euskara elkartearen ordezkariek, “Euskal Herrian aldaketa soziopolitiko handiak zian dira eta, era berean, eraldaketa sakona gertatu da euskal hizkuntza komunitatean”. Horri gutxi balitz, COVID-19ak eragin duen osasun larrialdiak herritarren bizimodu pribatu eta soziala baldintzatu ditu, “esan dezakegu herri eta hiztun komunitate gisa bidegurutze batean gaudela”. Horrekin lotuta dago hausnarketa prozesua, testuinguru hori guztiak aintzat hartuta, bide berriak urratzen lagunduko dion hausnarketa egin nahi du euskararen aldeko lanean 28 urteko bide luzea egin duen elkarteak, eta hausnarketa horrek, gainera, bat egingo du euskaltzaleen topaguneen mugimenduaren bidearekin.
Irekia izango da parte hartze prozesua, “hausnarketa eraginkorra eta partekatua izatea errazteko”, eta hori horrela, Errenteria-Oreretako euskalgintzan eta herrigintzan zeresana duten pertsona gehiagorekin heldu nahi diote prozesuari. Prozesuaren helburua, herriaren etorkizuneko erronkei, eta bereziki euskal hiztunen komunitatearen garapenari modu eraginkorrean eta partekatuan ekiteko hausnarketa bideratzea.
Parte hartze prozesua bideratzeko laguntza teknikoa emango die EMUN aholkularitzak.
Aipatu bezala, hiru saiorekin osatu dute parte hartze prozesua: Jakin, nahi izan eta ekin. Jakin, lehenengo saioa, datorren ostegunean izango da, eta egungo egoerara nola iritsi diren aztertuko dute, egindako ibilbidea, egungo agertokia eta nola sentitzen diren azalduko dute; bigarren saioa, Nahi Izan izenarekin egingo dutena, aktibatzeko arrazoiak, motibazioak eta non eragin dezaketen, finena, jardun arloak aztertuko dituzte; Ekin saioan, azkenik, plangintza osatuko dute, zer egingo duten, nola eta nirekin, eta zein helbururekin.
Parte hartze prozesuaren garrantza nabarmendu du Lau Haizetarak, eta euskaltzale oro deitu du bertara, ekarpenak egin eta hausnarketa partekatzera. Parte hartzeko, izena eman behar da aurretik eta horretarako hiru bide jarri ditu elkarteak herritarren eskura: 943 34 01 43 telefono zenbakira deitue ta erantzungailuan mezua uztea; 688 765 398 telefono zenbakira whtsappa bidaltzea, edo posta elektronikoz mezua bidaltzea.
