[Galeria] Karmengo Ama ikastetxea, sabairik gabe eta urak hartuta
Barbara ekaitzak eskolako sabaian eragindako kalteengatik, amiantoa zuen teilatua guztiz kendu behar izan dute. Babesteko ipinitako plastikozko olanak ez du euritea jasan.
Karmengo Ama ikastetxean teilatu berria eraiki behar dute. Bien bitartean, plastikozko olana batek estaliko du sapaia. 
Herenegun Barbara ekaitzak eragindako haizeek gogor astindu zuten Pasaia. Hainbestekoa izan zen haizetearen indarra non Karmengo Ama ikastetxeko teilatuaren zati bat eraman zuen asteazken gauean. Sabaian amiantoa zegoela atzeman eta berria eraikitzeko erabakia hartu zen, horretarako aurretik zegoen egitura eraitsiz. Lanak, baina, ezin dira egun batetik bestera egin eta eraikina babesteko behin-behineko plastikozko olana jarri zuten langileek, zeinak ez dituen bart gaueko euriteak jasan, kalte nabarmenak eraginez eraikinaren barnealdean.
Teilatuko zatiak patioko lurrean atzeman zituzten ostegun goizean.
Ostegunean, arduradunak zentrora heldu zirenean, teilatuaren hainbat zati lurrean aurkitu zituztela azaldu du Begoña Canal ikasketaburuak; suntsitutako egituran amiantoa zegoela jakin zenean, berehala deitu zuten Pasaiako Udalera, eta bertako langileak buzo eta babes jantziekin bertaratu ziren eskolara.
Enara Lizarralde irakasleak argitu nahi izan du ikastetxeko haurrak ez direla arriskuan egon, kaltetutako eraikina ez baita ikasgelak dauden eremukoa. Ikasleek, beraz, ohiko erritmoa mantendu dute eta teilatuko obrek nahiz euriteek ez diete zuzenean eragin. Kaltetuenak zuzendaritza taldeko kide nahiz irakasleak izan dira, haienak baitira urez bete diren gelak.
Oraindik ez dute zehaztu teilatu berria noizko amaitu ahal izango den; oraingoz argi dagoena da lanak ez direla etengo eta plastikozko olana sendotu beharko dutela langileek, igande honetarako, berriro, euria baitago iragarrita.
Urak eragindako kalteak
Haizeak erauzitako teilatu zatiak honako gela hauek dira babesten dituenak: zuzendaritza gela, aholkularitza, biltegia, gurasoen elkartearen bulegoa eta irakasle gela. Kalte nabarmenenak jangelako arduradunaren bulegoa denean eta irakasle gelan atzeman dira, horietan sartu baita ur gehien.
Langileak, buzo bereziekin, teilatu berria eraikitzen.
Kalte materialei dagokienez, ikasketaburuak azaldu du ondasun suntsikorrak direla, gehienbat, urak eragindako kalteengatik zokoratu behar izan direnak, haien artean folioak eta bestelako eguneroko tresneria. Zorionez, ez dirudi euriak ordenagailuak eta bestelako aparatu elektronikoak kaltetu dituenik, izan ere, horiek aurretik plastikozko poltsekin egoki babesten ahalegindu ziren obretako langile zein irakasleak.
Canalek bereziki eskertu nahi izan du egoera honen aurrean ikasleen gurasoek azaldu duten jarrera, hainbat prozesu atzera litezkeela ulertu eta onartuz.
