Lezoko asteburua: antzerkia bai, kirola ez
Allerruren partidak bertan behera gelditu diren bitartean, Munttarperen neskek jokatuko dute. Gainera, igandeko antzerki emanaldia mantendu dute.
Xake taldekoak bihar izango dira herrian. Osasun Sailak atzo ezarritako neurriek eragina izango dute asteburuan Lezon. Batetik, ez da kirol partidarik izango. Adibidez, Allerrurren hainbat taldek nahiz Munttarpeko nesken talde nagusiak partidak zituzten Lezon asteburuan, eta ez dira jokatuko: aldundiak herrialdeko kirol federazioak eskatu die bertan behera geldi daitezela partida guztiak bi astez behintzat.
Kultura, aurrera
Bestalde, kultur ekitaldiak bai egingo dituztela. Lezoko Kultura Sailarekin harremanetan jarri da HITZA, eta bertatik baieztatu dute igandeko Gezalako antzerkia egingo dela (sarrerak agortzear dira). Hau da, Xake Produkzioak konpainiak Fadoak entzuten zituen gizona taularatuko du Gezalan (20:00etan da).
Kultura Sailetik adierazi dute osasun segurtasun protokolo zorrotzak betetzen dituztela Gezalako emanaldietan, udarakoetan egin bezala. Hala, aforo muga eta distantziak ezarrita daude Gezalarako, baita sarrera-irteera eta higiene arauak ere. “Lezoko Kultur emanaldietan izan direnek esan digute osasun neurriak oso egokiak izan direla. Hala, betiere osasun zorroztasun printzipioa mantenduz, kultur ekitaldiekin jarraitzea erabaki dugu. Kulturak bultzada merezi du testuinguru honetan, eta horrela egingo dugu”, adiera dute Kultur Saileko ordezkariek.
Azaroan kultura gehiago
Biharko antzerki saioarekin amaituko dira urriko kultur ekitaldiak. Azaroan, ordea, gehiago daude. Honakoa da horien zerrenda:
Haurrentzako antzerkiak
- Azaroaren 13an (ostirala), 17:15ean eta Gezalan: Kataluniako La Baldufa konpainiaren Safari lana.
- Azaroaren 27an (ostirala), 17:15ean eta Gezalan: Anita Maravillas taldearen Cottondarrak.
Helduentzako jarduerak
- Azaroaren 8an (igandea), 20:00etan eta Gezalan: Andaluziako Histrion Teatro konpainiaren La isla antzerkia.
- Azaroaren 15ean (igandea), 20:00etan eta Gezalan: Extremadurako Teatrapo konpainiaren Desahucia2 antzerkia.
- Azaroaren 22an (igandea), 20:00etan eta Gezalan: Andaluziako Histrion Teatro konpainiaren Juana la loca antzerkia.
- Azaroaren 29an (igandea), 20:00etan eta Gezalan: Node taldearen White trans dantza-antzerki ikuskizuna.
Jarduera horietarako sarrerak esteka honetara sartuta lor daitezke.
