Lezon aurkeztuko dute Itaiaren Oarsoaldeko taldea
Igandean da Itaia Emakumeon Antolakunde Sozialistaren aurkezpena, Txerrimuñon. Osasun segurtasun neurriak izango dira bilkuran.
Itaia Emakumeon Antolakunde Sozialistaren Oarsoaldeko aurkezpena Lezon egingo dute, igandean (hilaren 25ean). Txerrimuñon da agerraldia, 18:00etan. Jaio berri da eragilea, eta Euskal Herriko dinamika izango du. Bidasoan ere sortu dute taldea: “Hemendik aurrera genero problematika landu eta programa sozialistaren gainean lanean arituko gara, emakume langileon askapena ipar”. Gaitasunak antolatu dinamikaren barruko aurkezpena izango da igandekoa: “Mugimenduan interesa duen edonor gonbidatu nahi dugu bertara, gure helburuak eta irakurketa politikoa zein diren ezagutzera”.
Itaiakoek jakinarazi dute Txerrimuñoko bilkurarako osasun neurriak hartuko dituztela: aforo muga dago, maskara derrigorrezkoa da, gel hidroalkoholikoa erabili beharko da eta distantziak mantenduko dira. Jende kopuruaren arabera, bi multzo egitea ere aurreikusi dute.
Bi urteko aurrelana
Sortu berria da Itaia, baina bi urte daramate sukalde lanean. Bitarte horretan emakume langileek jasaten duten zapalkuntza detektatu eta horiei aurre egiteko proposamen politikoa garatzen aritu dira, “auzi politiko-teorikoen analisi kritikoa erdigunean jarriz. Indar militantea batuz, gaurko testuinguru sozio-ekonomikoari aurre egiteko ematen ari diren proposamenetan ikusten ditugun hutsuneei erantzuteko, Emakumeon Antolakunde Sozialista osatzera salto egitea erabaki dugu”.
Egungo testuinguru ekonomikoak emakume langileen bizi baldintzetan atzeraldia bizkortu egin duela uste dute Itaiakoek: “Lanik eta diru sarrerarik gabe geratzea, instituzio burgesekiko dependentzia areagotzea, tratu txarrak jasaten dituztenen egoerak zailtzea, etxeko lanen karga nabaria…”. Hala, datozen urteetan egoera horiei aurre egiteko sortu eragilea, “emakume langileon biz baldintzak eta baldintza estrategikoak hobetzera begirako borroka prozesu etab lan ideologikoa abiatuko dugu”.
Oarsoaldeko Itaiak sare sozialetan kontuak ditu, Twiterren eta Instagramen hain zuzen ere. Haien gaineko informazio zehatzagoa horietan aurki daiteke.
