"Nahikoa konplizitate konkistatu dugu"
Errenteriaren 700 urteurrenaren harira, Errenteriako Udalarekin elkarlanean elkarrizketa sorta egiten ari da HITZA. Honakoa, LGTBI+ Mahaiko Andoni Etxeberria, Naroa Zabala eta Mikel Martini egindako elkarrizketa da, galderaz galdera hamar egunez HITZA-k zabalduko duena, osorik. LGTBI+ kolektiboaren errealitateaz, LGTBIfobiaz, sustatu beharreko politikez, eta parekidetasunaz mintzo dira, besteak beste.
LGTBIfobiaren aurkako egunean ortzadar banderak leiho eta balkoietan. Argazkia: Errenteriako LGTBI+ Mahaia Errenteriaren 700 urteurrenaren harira, Errenteriako Udalarekin elkarlanean elkarrizketa sorta egiten ari da HITZA. Honakoa, LGTBI+ Mahaiko Andoni Etxeberria, Naroa Zabala eta Mikel Martini egindako elkarrizketa da, galderaz galdera hamar egunez HITZA-k zabalduko duena, osorik. LGTBI+ kolektiboaren errealitateaz, LGTBIfobiaz, sustatu beharreko politikez, eta parekidetasunaz mintzo dira, besteak beste.
Konfinamendu betean LGTBIfobiaren aurkako nazioarteko egunean balkoiak ortzadar banderez josita esnatu ziren. Espero zenuten halako erauntsia eta babesa? Zer suposatu du?Andoni Etxeberria: Ni hunkitu egin ninduen, asko atera ziren.
Naroa Zabala: Ezusteko ikaragarria izan zen eta ilusioarekin argazki mordoa egin nituen, kristoren babesa eta goxotasuna sentiarazten dizuten uneak dira.
Mikel Martin: Nik ere ez nuen espero hainbeste. Etxetik atera eta bi ortzadar bandera zeuden, eskuz egindako beste bat beste balkoi batean, parean beste bat… Hau zer da?, pentsatu nuen, argi dago zerbait ongi egiten ari garela, konkistatu dugula nahikoa konplizitate, harrotasuna, eta indarra, hemen gaudela esateko, esateko berdin zaigula identifikatzea, guk identifikatzen dugula gure burua, indarrez.
Andoni Etxeberria: Kuriosoa izan zen gertatu zitzaidana. Familia batean hiru ahizpa dira eta bat lesbiana da. Beste birek bandera jarri zuten eta berak ez. Haietako batek esan zidan, ‘guk jarri dugu berak bere leihoa ez identifikatzeko’, babesa adierazteko bere partez jarri zuten. Halakoek harritu egiten naute.
Mikel Martin: Hori gertatu da eta gertatzen jarraituko du. Asumitu behar dugu gertatuko dela, baina zein polita da gurasoek edo ahizpek, edo lehengusuek galdetzeaa ea banderak dituzun jartzeko… Gure errealitatea partekatzen dutelako egiten dute, gure alde jartzen direlako,. Sorpresa izan zen. Ziurrenik guk uste duguna baina eragin handiagoa izango du gainera, haurrengan. Ortzadarraren koloreak identifikatzen dituzte bizitzarekin, gure alde polita identifikatzen dute.
