Tona bat arduragabetasun
Hondakin kopuru hori atera dute Errenteria-Oreretako ibaietatik aurten udalaren eta Behemendi Landa Garapenerako elkartearen elkarlanari esker.
Boluntarioak, Mater itsasontzian, kanpaina bitartean plastikoa biltzen. Tona bat. Hondakin kopuru hori atera dute Errenteria-Oreretako ibaietatik aurten udalaren eta Behemendi Landa Garapenerako elkartearen elkarlanari esker. Oiartzun ibaiaren ibilguan eta Tolarieta, Masti, Lintzirin eta Epentza erreken erretenetan bost eguneko garbiketa kanpaina egin du brigada batek ekainean eta irailean, eta naturgune horietatik 1.000 kilo inguru hondakin atera dituzte; hondakinen artean ugariena, plastikoa.
2016an abiatu zuten dinamika hori.
Oiartzun ibaiaren kasuan, Oiartzungo muga eta Santa Klara plazaren arteko zatia garbitu da, Lintziringo erretena LArtzabaletik hasita, eta Fanderiako kanala barne. Landa eremuan Tolarieta, Masti eta Epentza ibilguak garbitu dira. Tolarieta baserritik Masti Loidiraino, Loidi baserritik, Pontika auzora; eta Perurenatik Txikierdira.
Horrekin batera, Mater itsasontzi museoak Oiartzun ibaiaren beste garbiketa bat antolatu zuen hilaren 18an; Fanderiako ibilgu eta ibai bazterretatik 50 kilo hondakin jaso ziren.
Udala eta Behemendiren arteko garbiketa kanpainak zein Mater Ontziak egindakoak, hiritarrak hondakinen kudeaketak duen garrantziz eta gure jokaeraren ardura kolektibo nahiz indibidualaz sentsibilizatzea du helburu. Hondakinak jatorrian murriztu eta birziklatzeko egoki bereizten ez baditugu, ibaietan agertuko dira, horiek kaltetuz eta kutsatuz.
Hondakin horiek gainera, desegiten diren neurrian, ekosistemarako eta flora zein fauna basatientzat kaltegarriak diren konposatu kimikoak askatzen dituzte, kutsadura fokuak sortuz. Plastikoaren kasuan, hegazti nahiz arrainek hartan nahastu daitezke edota plastikoa irentsi, fauna desagerrarazteko arriskugarri izanik.
Horrenbestez, ardurarako deia egin du udalak, halako kutsadura saihesteko eta ingurunea zaintzeko.
