Izaskun Gomez: "Pasaitarrei laguntza eskatzen diet koronabirusaren zabalpena geldiarazteko"

Pasaiako alkateak osasuna babesteko Osasun Sailak ezarritako neurriak errespeta ditzatela esan die herritarrei. Pasaiarako neurri zehatzen berri eman du.

Urko Etxebeste

Pasaia

2020/10/24

Pasaiako alkate Izaskun Gomezek kezka azaldu du COVID-19a herrian izaten ari den eraginagatik. Deia luzatu die pasaitarrei: “Pasaitarrein laguntza eskatzen diet, koronabirusaren zabalpena geldiarazteko, osasuna babesteko, eta lehenbailehen normaltasunera itzultzeko”.

Pasaia behartuta dago Eusko Jaurlaritzako Osasun Sailak ezarritako neurri orokorrez gain, beste neurri zehatzagoak betetzera, mugikortasuna eta zenbait jarduera gehiago murrizten dituztenak. Izan ere, udalerriak azken hamalau egunetako 100.000 biztanleko tasa 500dik gorakoa du.

Hala, neurri horiek azaroaren 5era arteko indarrean izango direla jakinarazi du alkateak. Honakoak dira, hitzez hitz, horiek guztiak:

GOMENDIOAK

Udalerritik ez irtetea, honako kasu hauetan izan ezik: osasun-zentroetara joateko, lan-arrazoiengatik, ikasketengatik, ohiko bizilekura itzultzeagatik, mendeko pertsonak zaintzeagatik edo ezinbesteko arrazoiengatik.

Gizarte-jarduera mugatzea, bizikidetza egonkorreko taldetik kanpo, eta familia- edo gizarte-jarduerak bertan behera uztea.

Bizikidetza egonkorreko taldera murriztea barruko espazioetako gizarte-topaketak, eta gizarte-elkarrekintzako jarduerak espazio ireki eta ondo aireztatuetan egitea.

DEBEKUAK ETA BERTAN BEHERA UTZITAKOAK

Bertan behera uzten da taldeko edozein kirol jarduera, martxan dauden kirol lehiaketa ofizialak izan ezik. Bakarka bakarrik egin ahal izango da kirola

Debekatuta dago 21:00etatik 06:00etara haur parkeak, parke publikoak eta plazak erabiltzea, pertsonen joan-etorrietarako izan ezik.

Debekatuta dago alkohola saltzea edozein establezimendutan 21:00etatik 08:00etara bitartean.

Establezimendu komertzial guztiek, elikagai denda, botika eta erregai establezimenduek izan ezik, 21:00etan itxi beharko dute.

Ostalaritza

Ostalaritzako establezimenduek egunero (baita jaiegunetan ere) 21:00etan itxi beharko dute, eta ezingo dute 06:00ak baino lehen ireki .

Gehienezko aforoa %50ekoa izango da, terrazetan izan ezik, eta horietan mahaien arteko distantzia errespetatu beharko da.

Debekatuta dago barran kontsumitzea, eserita soilik hartu ahal izango da kontsumizioa; eta debekatuta dago zutik egin beharreko edozein jatetxe jarduera, besteak beste koktelak edo antzekoak

Maskarak erabiltzea derrigorrezkoa izango da establezimenduko langile eta bezero guztientzat, janaria eta edaria kontsumitzen ari diren une horretantxe izan ezik.

Eskola Kirola

Ez dira baimentzen eskola kiroleko jarduera presentzialak.
Kiroldegietan banakako jarduerak osasun agintariek ezarritako protokoloak errespetatuz egingo dira. Ikastaroak ez daude baimenduta.
Debekatuta daude 2007az geroztik jaiotako kirolarien lehiaketak eta entrenamenduak. Lehiaketa ofizialak baimenduta daude.
Gipuzkoako Foru Aldundiak modalitate kolektiboetako federazioei eskatu die lehiaketa ofizialak bertan behera uzteko datozen bi asteetan.
Jarduera fisikoaren orientazio-zerbitzuak ahal dela telematikoki emango dira, kontakturik gabe, eta dagozkion segurtasun-neurriak betez.
Ez da baimentzen Tipi Tapa programa.

Erlazionatutako edukiaPasaia eta Lezo: bertatik ez sartu ez irtetea aholkatu du Jaurlaritzak

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.