Oiartzungo neskek debut ona egin dute etxean
Senior mailako futbol talde bakarrak jokatu du asteburuan, Gipuzkoa mailatik gainekoak direlako. Gasteizko Aurrera gainditu zuten.
Maria Granado izan zen golegileetako bat. Oiartzun Kirol Elkarteko senior kategoriako talde bakarrak jokatu du asteburuan: nesken talde nagusiak. Gipuzkoa bakarrik barnebiltzen duen liga batean jokatzen ez dutenez, lehian aritzeko aukera izan dute.
Karla Lekuonako lehen partida izan zen larunbatekoa. Denboraldia gaizki hasi zuten Bizkaiko hiriburuan, eta buelta eman nahi izan zioten hasiera ezkor horri, Gasteizko Aurreraren kontra. Gainera, Leire Manterola taldekideari garaipena eskaini nahi zioten, lotailu gurutzatu bat hautsi baitu. Animo mezudun kamisetak jantzita atera zuten argazkia.
Partida gorabeheratsua izan zen. Arabarrak lerroak ongi zainduta atera ziren zelaia, baina ez zuten oiartzuarren aterako bidea aurkitu. Oiartzuarrei kontrakoa gertatu zitzaien: kosta zitzaien jokoan sartzea, baina behin lortuta, aukerak sortu eta partida eramateko gai izan ziren. Maite Fernandez de Casadevante eta Maria Granado izan ziren golegileak.
Gainontzeko partidak bertan behera geratu ziren, baita Oiartzungo Saskilagunek Elorsoron jokatuko zutena ere.
Leire Manterolari animoak eman zizkioten bere taldekideek.
