Baratze parkean izena emateko epea zabalik da oraindik
Azaroaren 2a da izena emateko azken eguna eta horretarako eskaera inprimakiak bete eta Udal informazio bulegoan edo erregistro elektroniko bidez aurkeztu beharko dituzte.
Baratze parkean izena emateko epea zabalik dagoela oraindik gogorarazi du Lezoko Udalak; azaroaren 2a da izena emateko azken eguna eta horretarako eskaera inprimakiak bete eta Udal informazio bulegoan edo erregistro elektroniko bidez aurkeztu beharko dituzte. Eskaera inprimakia, betebeharreko baldintzen eta aurkeztu beharreko dokumentazioaren informazioa hemen dago eskuragarri.
Eskatzaile izateko ezinbesteko baldintza da Lezon erroldatuta egotea eta azken hiru urteetan bertan bizitzea.
Izena emateko epea amaituta eta eskaera guztiak jasota, udalak onartu eta baztertuen zerrenda argitaratuko du; hamar eguneko epea izango dute erreklamazioak egiteko interesdunek. Epe hori pasata, onartu eta baztertuen behin betiko zerrenda osatu eta 59 partzelak zozkatuko ditu udalak. Horri lotuta, gaur egun Baratze Parkeko erabiltzaile direnek beren baratzarekin jarraitu nahi badute izena eman beharko dute. Zozketan hautatuak badira, beren partzela erabiltzen jarraitzeko aukera emango diete.
Lezoko Baratze Parkearen sorrera
2012an sortu zen Lezoko Baratze Parkea Lezoko Udalak eta Kutxa Ekoguneak abiatutako lankidetzari esker. Udalerria Baratze Parke Sareko kide izatera pasa zen orduan. Baratze Parkean, autokontsumorako baratzezaintza ekologikoa sustatzen da, erabiltzaileei baratzeak auzolanean kudeatzeko aukera eskainita. Zortzi urte hauetako emaitza ona ikusita, udalak eta Ekoguneak berriki berritu dute lankidetza hitzarmena, egindako lanari jarraipena emateko, “ingurumenarekiko errespetua eta iraunkortasunaren kultura sustatzen jarraitzeko asmoz”. izan ere, hori da hitzarmenaren helburu nagusietako bat, naturarekiko errespetua sustatzea eta giza talde ezberdinen arteko elkarbizitza, elkarlana eta harremanak bultzatzea Baratze Parkea aisialdirako topagune aktibo bilakatuz.
Izena emateko epea zabaltzearen arrazoia, aurtengo abenduaren 31n orain arteko erabilera lizentzia guztiak bukatuko direla da.
Baratze Parkean urte hauetan hainbat berrikuntza egin ditu udalak nabarmendu duenez, erabiltzaileen beharretara egokitzekoa asmoz. Orain, lanabesak jasotzeko txabolaren alboko gunea egokitu du. Lokatza pilatzen zen eremu horretan, eta zulodun lauzak jarri ditu udalak. Horrez gain, erabiltzaileek beren lanabesak garbitzeko gunea egokitu du harraska ondoan.
