Denboraldi berriaren aurkezpena egingo du Zintzilik irratiak
Denboraldi berriaren aurkezpena, datorren larunbatean egingo dute Niessen Kulturgunean 18:30etik 20:30era, aforo mugatuarekin eta osasun neurri guztiak beteta.
Zintzilik irratiko kideak artxiboko argazki batean. Argazkia: Zintzilik Irratia Ezohiko denboraldia amaituta, gogoz dator Zintzilik irratia denboraldi berria aurkeztera. Osasun egoera dela eta, bertan behera geratu dira irratia ezagutarazteko eta auto kudeatzeko aurreikusiak zituzten iniziatibak, baina agertokiaren zailtasunak ez du eten irrati librearen lana, eta emititzen jarraitu dute uneoro.
Denboraldi berriaren aurkezpena, datorren larunbatean egingo dute Niessen Kulturgunean 18:30etik 20:30era, aforo mugatuarekin eta osasun neurri guztiak beteta. Sarrerak 5 euroan daude salgai kulturguneko leihatilan, eta aurkezpenaren egun berean ere eros daitezke, aurretik agortu ez badira.
Aurkezpen ekitaldian bakarrizketa egingo du txikik, 40 urte eta aldapan behera niek/n!, eta J.B Pedradasek El hombre blandengue antzezlana taularatuko du. Emanaldien artean, programazio berria aurkeztuko dute, eta gainera, uztailetik martxan dagoen #niereharibatetikzintzilik laguntza ekonomikoa jasotzeko kanpaina aurkeztuko dute jendaurrean. Zintzilik irratiko materialarekin postua ere izango da, eta zozketan parte hartzeko txartelak ere jarriko dituzte salgai.
Aurkezpena ez da orain artekoak bezalakoa izango, “egungo egoerara egokitu dugu, gure ohiko kontzertu eta jaietatik kanpo, eserita, baina barre egiteko asmoz, inoiz baino beharrezkoagoa baita”.
Zintzilik irratiak elkarlanerako deia egiteko baliatu du aukera, “ateak zabalik ditugu gurekin elkarlanean aritu nahi dutenentzat, baita denboraldi honetan zehar gure bidelagun izan nahi dutenentzat”.
