Elkartasun Jaia Lau Haizetararen eskutik
Bihar egin dute hitzordua, odola emateko eta elikagaiak jasotzeko, Merkatuzarren. Odola eman nahi dutenek, hitzordua hartu behar dute aurretik, osasun eta segurtasun neurriak bermatzeko
Odola ematera gero eta gazte gehiago hurbiltzen ari dira. Ez da ohiko jaia; bai ospatzeko modukoa, ordea, izan ere, elkartasun ariketa handia egingo dute hainbat herritarrek Lau Haizetara euskara elkartearen eskutik. Elkartasun jai horretara bertaratzen direnek, eman egingo dute, beste askok behar dutenari erantzuteko: odola eta elikagaiak emango dituzte, zehazki. Guziak musutruk odol eemaileekin bat eginez, edota Zaporeak elkartearen bidez Moriako kanpalekuan dauden errefuxiatuek jatekoa izan dezaten. Hilabetero antolatzen dituzte bi ekintza horiek.
Bihar egin dute hitzordua, odola emateko eta elikagaiak jasotzeko, Merkatuzarren. Odola eman nahi dutenek, hitzordua hartu behar dute aurretik, osasun eta segurtasun neurriak bermatzeko, eta horretarako 688 765 398 edo 600 224 950 telefono zenbakietara deitu behar dute; odol ematea 16:30etik 20:30era izango da.
Elikagaiak, Merkatuzarren bertan jasoko dituzte, 17:30etik 20:30era.
100 emaile lortzea, helburu
Lau Haizetara Euskala Taldea arduratzen da odol emateak eta janari bilketa antolatzeaz. Une honetan, 75 dira hilabetero bertaratzen direnak odola ematera. Helburua, berriz, 100 emailera heltzea du elkarteak. Bidean doaz, eta bien bitartean, balorazio positiboa egin dute, gero eta gazte gehiago inplikatzen ari direlako.
