Beste sari bat Legorbururentzat, enegarrena
Mutrikuko Udalak antolatzen duen Ziriako Andonegi mikroipuin lehiaketa irabazi du Iñigo Legorburu errenteriarrak.
Iñigo Legorburu. Mutrikuko Udalak antolatzen duen Ziriako Andonegi mikroipuin lehiaketa irabazi du Iñigo Legorburu errenteriarrak, Begiradak lanarekin. Martxo-apirileko konfinamenduko egunik gogor eta beltzenetan antolatu zuten lehiaketa, “egun horietako tristura, beldurra eta egonezina” agerian utzi dituela lanaren bidez dio idazleak, “baita leiho bat zabaldu ere itxaropenari”.
Mikrokontakizun bat idazteko zailtasunak aipatu ditu Legorburuk, “ideia original bat behar duzu lehenik, eta hitz gutxirekin istorioa harilkatu ondoren. ESpresioak motzak eta zehatzak behar dute, eta irakurlea sortutako atmosferan barneratzea lortu behar duzu. Hitzen destilazioa praktikatzen dugu mikrokontakizunaren generoa jorratzen dugunok, tantaz tanta, istorioaren jarioa eten ez dadin”.
Migratzaileen gaia aukeratu du kontakizunerako, “konfinamenduan lana, familia eta aterpe bat genuenok, gure balizko zoritxarra madarikatzen genuen bitartean, ikusezin jarraitzen zuten migratzaileek”.
31 lan aurkeztu dituzte guztira lehiaketara. Legorburuk, 50 euroko diru saria eta diploma jaso ditu.
