Menuen QR kodeak euskaraz jartzeko aukera Oarsoaldean
Euskaratu nahi diren menuen testua Lezoko, Pasaiako eta Oiartzungo euskara zerbitzuetara bideratu behar dute ostalari eta jatetxeetako arduradunek.
Jatetxe eta tabernetan dauden menuak QR kode bitartez jasotzen ari dira herritarrak, batez ere, osasun larrialdi egoera hasi zenetik: euskarri digitalak erabiltzen ari dira establezimendu horiek duten eskaintzaren berri emateko. Horren harira, Lezoko, Pasaiako eta Oiartzungo udalek, Oarsoaldeko Euskara Batzordearen laguntzarekin, QR kode bidezko menu horiek euskaraz ere egon daitezen aukera ematen dute, doan.
Nola eraman euskarara menu digital horiek? Erraza. Establezimenduek QRan jarri nahi duten menua, karta nahiz zerrenda, dagokion udaleko euskara zerbitzura bidali behar dute, posta elektronikoz, edo zuzenean euskara zerbitzuetara. Egun batzuen buruan prest izango da euskarazko argibideak ere izango dituen menua. Euskarara itzultzea udalen gain geratuko da, baina gainerako hizkuntzetakoa egina eraman beharko dute ostalari eta jatetxeetako arduradunek.
Posta elektronikoz bada, beheko loturetan klik eginda aterako diren helbideetara bidali behar dira euskarara eraman nahi diren menuak:
- Pasaiako ostalari eta jatetxe arduradunentzat prestatutako helbidea.
- Lezoko ostalari eta jatetxe arduradunentzat prestatutako helbidea.
- Oiartzungo ostalari eta jatetxe arduradunentzat prestatutako helbidea.
