Udalak '.eus' domeinua ordainduko die herriko 100 entitateri
Oiartzungo Udalak eta PuntuEus Fundazioak aitzindaria den hitzarmena sinatu dute, mundu digitalean euskararen presentzia areagotzeko.
Josu Waliño PuntuEus Fundazioko zuzendaria eta Jexux Leonet Oiartzungo alkatea. Oiartzungo Udalak eta PuntuEus Fundazioak hitzarmena sinatu dute gaur goizean, mundu digitalean euskararen presentzia sustatu eta handiagotzeko. Hitzarmena “aitzindaria” dela jakinarazi dute bi aldeek. Bi urterako izango da.
Lehenik eta behin, egoera zein den aztertuko dute, eta horren arabera, ekintzak erabaki. Udalak erraztasunak eman nahi ditu: 100 .eus domeinu ordainduko die —urtebetez— herriko beste hainbeste entitateri.
Jexux Leonet alkateak esan duenez, “ohorea” da horrelako hitzarmen bat Oiartzunen egitea. “Oiartzunek euskaraz bizitzeko hautua egin du. Mundu digitala normalizatu behar da, eta Oiartzunen aukera handiak ditugu: udalerri euskalduna da eta industriagune asko ditu”, esan du alkateak.
Udalaren helburua euskararen erabilera eta presentzia normalizatzea da, modu naturalean jarduteko modu bihurtu arte.
Lanin, Euskara Merkataritzara eta Euskara elkartera dinamikek duten kanalen bidez egingo dute .eus domeinua lortzeko hedatze lana. Sare horiek ehunduta edukitzea abantaila da Aitziber Arnaiz Euskara teknikariaren arabera, eta plana herrian sozializatuko duela ziurtatu du.
Euskarazko webguneak, %20 bakarrik
Josu Waliño PuntuEus Fundazioko zuzendariak eskerrak eman dizkio Oiartzungo Udalari. “Lehen aldia da maila lokaletik globala denera pausoak ematen direla”, gaineratu du. Espero du Oiartzunen martxan jarri berri den eredua beste herrietara eraman ahal izatea.
Euskarak presentzia duen webguneak %16 bakarrik direla penatu da Waliño. Oiartzungo datuak eman ditu: 1.000 webgune daude Oiartzunen, eta %20 bakarrik du euskarazko edukiren bat. “Kopuru oso txikia da horrelako herri euskaldun batean”, zehaztu du.
Iniziatibak salto egiten laguntzeko hiru gako eman ditu Waliñok. Alde batetik, euskararen presentzia neurtzeko tresnak udalaren eskuetan utziko dituzte, hartara jarraipena egin eta sustapen lanak egiteko. Bestetik, Oiartzungo Udalaren eskuetan utziko dituzte 100 domeinu horiek. Azkenik, ingurune digitalean herriko entitateak txertatzeaz gain, kontzientzia sortu nahi dute herritarrengan; adibidez, aplikazio eta programak euskaraz konfiguratzeko.
“Oraindik politika eta estrategia argiak behar ditugu. Hitzarmen hau pauso bat da bide horretara”, adierazi du PuntuEus Fundazioko zuzendariak.
“Komunitatea gara”
Bukatzeko Leonetek animoak eman dizkio Waliñori, euskalduntze bide horretan jarrai dezaten. “Bereizketa egin behar euskararen erabileran. Badaude etxeko eta kaleko erabilera, eta badago lan mundua. Lan mundua gero eta globalagoa da, eta gure herrian txertatu nahi dugu. Digitalizazioak zailtasunak baditu euskara erabiltzeko orduan”, esan du alkateak.
Waliñok nabarmendu du PuntuEus Fundazioa ez dagoela bakarrik bidean, eta horregatik ari dela eragile eta erakundeekin lankidetzan. “Komunitate oso bat gara”, esan du.
