Euskara eta merkataritza uztartuz, argazki lehiaketa antolatu dute
Lehiaketaren irabazleak Oarsoaldeko saltokietan gastatzeko 400 euroko txartela irabaziko du, eta 200 eurokoa bigarren saridunak. Argazkiak abenduaren 3ra arte bidal daitezke.
Euskararen Paparazziak argazki lehiaketaren hirugarren edizioa antolatu du Oarsoaldeko Euskara Batzordeak. 
Euskararen Paparazziak argazki lehiaketaren hirugarren edizioa antolatu du Oarsoaldeko Euskara Batzordeak, argazkigintza, euskara eta merkataritza/ostalaritza uztartzeko helburuz. Argazkiak azaroaren 10etik abenduaren 3ra bitartean bidali ahal izango dira.
2016an hasitako bideari jarraituz, ‘Prezio berean, euskaraz!’ egitasmoaren barnean antolaturiko argazki lehiaketa martxan da berriz ere Oarsoaldean. Lau udalerrietako merkataritza eta ostalaritza establezimenduetan euskararen erabilera handitzeko, hizkuntza paisaiak duen garrantzia azpimarratzea du helburu egitasmoak.
Lehiaketan parte hartu nahi dutenek Oarsoaldeko saltokietan ikusgai eta euskaraz dauden errotuluei, kartelei edo bestelako idatziei argazkiak atera, eta WhatsApp edo e-posta bidez (Wetransfer erabiliz, behar izanez gero) bidali beharko dituzte 688 78 21 84 zenbakira.
Argazkiak azaroaren 10etik abenduaren 3ra bitartean bidali ahal izango dira eta lehiaketaren irabazleak 2020ko abenduaren 21etik 2021eko urtarrilaren 30era bitartean Oarsoaldeko saltokietan gastatzeko 400 euroko txartela irabaziko du, eta 200 eurokoa bigarren saridunak. Abenduaren 15ean emango dira ezagutzera irabazleen izenak.
Informazio gehiago nahi duenak oinarriak eskura ditu webgunean.
