Pasaia euskararen olatuz blaitzeko bildu dira herriko gazteak
Euskararen erabilera urriaren inguruan hausnartzeko elkarretaratzea egin dute barruti ezberdinetako gazteek. Hizkuntzaren erabileraren bitartez "itsasikara" sortzera animatu dituzte pasaitarrak.
Larunbatean bildutako pasaitarrak, Antxoko alamedan. 
Euskararen erabilerarekin kezkatuta, Pasaiako barruti ezberdinetako gazteak elkartu dira larunbat honetan Antxoko Kultur Etxean. Hizkuntz ohituren inguruko gogoeta egin eta manifestu bat kaleratu dute gazteon euskararen erabileraz eta sor daitezkeen ekintzez hausnarketa zabaltzeko.
Euskaldunon bereizgarri dugun hizkuntzaren erabilpen urriaren aurrean, errudunak bilatu baino, pasaitarrek bat egin dezaten lortzeko helburuz mintzatu dira Gazte Olatuko kideak: “Euskara hazten saiatzen ari den barrutietan eta ustez oso euskalduntzat ditugun barrutietan ere bai”. Badian itsasikara egitera animatu nahi izan dituzte gazteak.
Elkarretaratzean, esandakoaz gain, azaroaren 20tik abenduaren 4ra izango den Euskaraldiaren bigarren edizioan izena eman eta parte hartzera deitu zituzten Pasaiako gazteak.
