Oarsoaldeko 45 urtetik gorakoek industrian aritzeko aukera dute
Industria 4.5 egitasmoari esker eskualdeko hamabost lagun industria sektorean lana eskuratzeko ikastaroa jasotzen ari dira Don Boscon.
Oarsoaldeko 45 urtetik gorakoek aukera dute industriaren sektorean lana topatzeko. Izan ere, Oarsoaldea Garapen Agentziak, Gipuzkoako Foru Aldundiarekin elkarlanean, Industria 4.5 egitasmoa abian du adin tarteko horretako herritarrei lan aukerak emateko. Oarsoaldeko Inklusio Sarea ari dira baliatzen zeregin horretarako: enplegu egitasmo integrala da.
Osasun krisiak gehien kolpatu duen kolektiboa zerbitzuena da, zehazki, sektore horretan lan egiten duten 45 urtetik gorako emakumeena. Hala, horiek industrian lan aukera izan dezaten abiatu dute Industria 4.5. “Industria sektorea da kalitatezko enplegua eskaini dezakeen sektoreetako bat”, nabarmendu dute eskualdeko garapen agentziatik.
Egitasmoaren bidez, parte hartzaileen prestakuntza maila handituko da, enplegagarritasuna hobetzeko, eta industria sektorean txertatu ahal izateko. Urriaren 20an hasi ziren egitasmoa egikaritzen, hamabost partaiderekin: 11 emakumeak dira, lau gizonak; horietatik bik aniztasun funtzionala dute, eta beste zortzi Euskal Herritik kanpo jaiotakoak dira.
Datozen hilabeteetan Lehen Mailako Ziurtagiri Profesionala lortzeko aukera izango dute partaideek (Fabrikazio Mekanikoko Eragiketa Osagarriak titulua), 400 orduko ikastaroan. 40 ordu egingo dituzte praktiketan enpresetan. Gainera, ikastaroan parte hartzen dutenek zaintza zerbitzua dute eskura, eta diru laguntza jasotzeko aukera. Don Boscon ari dira trebatzen hamabost partaideak.