Posta zerbitzu eta lan baldintza duinak eskatu dituzte
Plantillan aurreikusitako langileak ez daude, eta haien falta nabarmen sumatzen dute Errenteria-Oreretako postetxeko langileek.
Plantillan aurreikusitako langileak ez daude, eta haien falta nabarmen sumatzen dute Errenteria-Oreretako postetxeko langileek. Langile falta horrek, bertan dihardutenei lan karga handia eragiteaz gain, herritarrengan ere badituela ondorioak salatu dute postariek gaur goizean elkarretaratze baten bidez. Bizi duten egoerak etengabeko estresa eragiten ari zaiela langileei diote postariek, “egunero hainbat banaketa eremu bete behar izaten ditugu, baina plantillan langileak falta direla eta, beste eremu batzuk banatu gabe geratzen dira”.
Egunero pilatutako gutunak dituzte postetxean, “egunero egin behar diogu aurre egoera horri” eta osasunean eta zerbitzuaren kalitatean eragina izaten ari den zalantzarik ez dute. Horri guztiari COVID-19aren osasun larrialdiak eragindako egoera gehitu behar zaio, “lana uneoro maskara jarrita egin behar dugu, entregetan, igogailuetan, atarietan guardia jaitsi gabe”.
Lan baldintzetan eragina du langile faltak, baina herritarrak ere pairatzen ari direla egoera agerian jarri dute. Hala, askotan oso garrantzitsuak diren entregak atzeratu egiten direla azaldu dute, “enplegu bulegoarekin lotutako jakinarazpenak, mediku azterketak… epez kanpo entregatzen dira eta herritarrei nahasmen handia eragiten die horrek”.
Egoera salatzeko kalera atera dira gaur, ordu erdiko elkarretaratzea egitera. Deialdia, CCOO, LAB, ESK, UGT eta ELA sindikatuek egin dute. Bihar, berriz ere aterako dira kalera bizi duten egoera salatzera, 09:30etik 10:00etara.