Urmaela izango dute anfibioek
Oiartzun ibai ingurunea lehengoratzeko eta anfibioentzako urmael bat sortzeko obrak hasiko ditu aste honetan URA agentziak. Ibaiaren ezker bazterrean egingo dituzte obrak, Lartzabal eta Fanderia artean.
Oiartzun ibai ingurunea lehengoratzeko eta anfibioentzako urmael bat sortzeko obrak hasiko ditu aste honetan URA agentziak. Ibaiaren ezker bazterrean egingo dituzte obrak, Lartzabal eta Fanderia artean eta aurretik eremu horretan egindako beste lanekin bat egingo du. Hala, Fanderiako meandroaren aurrean ibilguaren zabalera handitu zueten aurretik, Oiartzun ibaiaren eta Lintzirin errekaren urak bateratzen diren lekuan. Halaber, erosio prozesuak eteteko, Fanderiako meandroaren ezkerraldeko erribera finkatu zuten, eta erriberako basoa lehengoratu zuten, besteak beste, haltzak, lizarrak eta urritzak aldatuta.
Hobekuntza lanak egiteko, hainbat ibilgailu astunen trafikoa areagotuko daa eta platanondo batzuk kimatu edo moztuko dituzte Fanderia auzoan.
2015eko abenduaren 2an Oiartzun ibai inguruneko Paisaiaren Ekintza Plana onartu zuen udalak. Horren barruan, azken urteetan zehar hainbat iniziatiba egin ditu udalak ibaiko habitataren hobetze ekologikoari begira: Fanderiako arrapala, ur beltzak bildu eta uraren kalitatea hobetzeko jarduerak, izokin arruntaren itzulera, haltzadien berreskuratze biologikoa…
Horrekin batera, udalak hitzarmena sinatu zuen URA agentziarekin. Horren arabera, hiri eremuetako ibai tarteak garbitzeko konpromisoa hartu zuen udalak, eta URAk berriz, ibaietako ingurunearen lehengoratzeari ekiteko, ibilguak, ibai bazterrak eta habitatak berreskuratuz. Testuinguru horretan kokatu behar dira urmaela sortzeko lanak.