'Gutiziak' liburuaren irakurraldi jarraituan parte hartzeko gonbita luzatu dute
Hitzen Lihoa iniziatibaren barruan egingo dute, bigarren aldiz. Azaroaren 27ra arte eska daiteke liburua.
![gutiziak Oiartzun](https://oarsoaldea.hitza.eus/site/files/2020/11/img-20191125-wa0035-500x313.jpg)
Iaz egin zuten, estreinakoz, irakurraldi jarraitua.
Hitzen Lihoa iniziatiba ari da aurtengo ekitaldia prestatzen. Hizteria kolektiboa proposamena martxan dago, eta beste bat abiarazi nahi dute: irakurraldi jarraitua. Bigarren aldiz egingo dute, iazkoan Zergatik, panpox? askoren artean irakurri ondoren.
Aurtengo gaia sorkuntza kolektiboa izango da. Horregatik, hainbat emakumeren artean osatutako Gutiziak liburua (Txalaparta, 2000) aukeratu dute; bakoitzak narrazio bat sortu zuen libururako.
Irakurraldi jarraitua abenduaren 13an izango da, udaletxeko pleno aretoan, 11:00etan hasita. Ekitaldian parte hartu nahi dutenek hilaren 27ra arte izango dute izena emateko epea. E-posta bidez idatzi beharko dute, parte hartu nahi dutela adieraziz. Hitzen Lihoako kideek erantzungo diote liburuaren zein zati irakurri beharko duen publikoki.