Indarkeria matxista instituzionalari buruzko bi emanaldi, datorren astean
Azaroaren 25ari begira, bi ekitaldi antolatu ditu Oiartzungo Udalak. 'Florecica' eta 'Quítame la culpa' lanen emanaldia eskainiko dute.
Hilaren 25ean indarkeria matxistaren kontrako eguna izango da, eta horren harira, udaleko Feminismo Sailak eta Oiartzungo Feministen Asanbladak pare bat emanaldi antolatu dituzte datorren asterako. Hurrengo asterako hainbat hitzaldi antolatu dituzte.
Emakumeen kontrako indarkeria gehien aipatzen den mota da bikote edota etxe barrukoa, baina Historian zehar mota ugari egon direla nabarmendu du Feminismo Sailak. Aurten fokua indarkeria instituzionalean jarri nahi dute.
“Indarkeria mota hau erakundeek -ordezkarien bidez edo utzikeriarengatik emakumeak babesgabe utziz- emakumeenganako eragiten dutena da”, nabarmendu dute.
Florecica, online
Datorren astean Florecica dokumentala ikusteko aukera egongo da, online. Josefina Lambertoren bizitzari buruzko dokumentala. Maravillasen ahizpa da, zeina 1936an Larragan (Nafarroa) bortxatu eta hil zutena.
Zazpi urte zeukan orduan Josefinak. Vicente aita eta Maravillas ahizpa hil ondoren Paulina amak, Pilar ahizpak eta berak izan zuten bizimodua kontatzen dute Florecica dokumentalean; 21 urterekin moja bihurtu eta Pakistanera joan zenetik aurrera bizitutakoak eta azkenik, fedea galdu eta 1996an Iruñeara itzuli eta AFFNA36 elkartearen sortzaile izan zenekoa (Nafarroako Fusilatuen Senitartekoen Elkartea). Gaur egun, Josefina Lamberto eta haren ahizpa Maravillas memoria historikoaren sinbolo dira.
Florecica dokumentala sarean eta bakoitzak bere etxetik ikusteko modua eskainiko die udalak oiartzuarrei. Honela, hilaren 18tik 20ra (datorren asteazkenetik ostiralera), ikusi ahal izango da dokumentala, bakoitzak nahi duenean. Horretarako, webgune bat egokitu dute. Pasahitz hau sartu behar da: oiartzun2020.
Juan Luis Napal eta Virginia Senosiainek egin dute dokumentala. Gaztelerazkoa da jatorrizko bertsioa, baina euskarazko azpitituluekin ikus daiteke.
Quítame la culpa fanzinea, emanaldi
Datorren asteko beste emanaldia Quítame la culpa emanaldia emango dute. Asteazkenean izango da, 18:30ean hasita, udaletxeko areto nagusian (gazteleraz izango da).
Cris Lizarraga musikariak eta @culomala meme sortzaileak Quítame la culpa fanzineari buruzko emanaldia osatu dute. Lizarragarena dira testuak eta @culomalak egin ditu ilustrazioak.
Bikote harreman ez-osasuntsuei buruzko hausnarketak eta kontakizunak bildu ditu bertan Lizarragak, esperientzia pertsonalak eta ingurukoenak saiakera moduan jasota. “Guztia erruaren kontzeptura murrizten da. Erruduntasunak suntsitu egiten gaitu, gure burua etengabe epaitzera eta gure tirano propioak bihurtzera garamatza”, adierazi du Lizarragak.
