Bidean kide gehiago gera ez daitezen bildu dira ostalariak
Diru laguntzak "irrigarriak" direla uste dute Pasaiako ostalariek. Elkarretaratzea egin dute gaur goizean, larriki bizirauten saiatzen ari direla salatzeko.
Pasaiako ostalariak udaletxearen aurrean bildu dira gaur goizean, sektorearen eteteak hari batean dituela salatzeko. Tabernen jabeek nabarmendu dute ez direla soilik barraren aurrean daudenak murrizketa berrien ondorioak pairatzen ari direnak, atzean beste familia asko baitaude alorraren ekoizpenetik bizi direnak.
SOS Ostalaritzaren izenean adierazi dute orain arte jasotako laguntzak (jaso dituztenek, behintzat) ez direla nahikoak: “Laguntzak irrigarriak dira, horiekin ezin dugu biziraun”. Kasu gehienetan diru kopurua ez da aski establezimenduen gastuei aurre egiteko, hala nola, terrazen gaineko zergak, alokairuak, elektrizitatea…
Desinformazioa dute sektorearen ziurgabetasunaren erruduntzat; Eusko Jaurlaritzak iragarri zuen diru laguntzak emango zizkiela ostalariei, baina ez dute ezer berririk jakin ordutik: “Jakin ahal izan dugunez, oraindik ez da laguntzei buruzko dokumenturik argitara atera. Galeriaren aurrean oso polita gelditu zen albistea, baina guk ez dakigu beste ezer egunera arte”.
Ez dute soilik tabernarien izenean hitz egin: “Ez gara soilik gu, ehunka familia daude aurrera irten ezingo dutenak diru kopuru horiekin”, orotariko hornitzaileak, besteak beste.
Bilkurarekin bat egin dute Pasaiako EH Bildu eta Ahal Dugu-Podemos alderdietako zinegotziek. Udaletxearen aurrean bildutako ostalariei diru laguntzei buruzko hainbat aholku eman, ezinegonei erantzun eta elkartasuna adierazi nahi izan diete.
