Gabonetako argiak jarrita, tokiko merkataritza sustatu nahi dute
Argiak jartzearen kostua kalkulatu du udalak: 1.250 euro ingurukoa izango da.
Gabonetako argiak jartzen hasi da udala herriko auzo guztietan. Horren atzean, “izpiritua pizteko” asmoa dagoela azaldu du, “merkatari txikiak bolada oso gogora pasatzen ari dira, eta garrantzitsua da tokiko erosketa arduratsuen izpiritua piztea. Argiak ere lagungarriak izan daitezke garai honetan merkataritza dinamizatzeko”. Hala uste dute Errenkoalde merkatari, ostalari eta zerbitzu elkarteak, eta Beraungo merkatarien elkarteak, eta aurten ere argiak jartzeko eskatu diote udalari.
Auzo guztietan jarriko ditu udalak argi horiek, eta bereak dituenez ez du inbertsiorik egin beharko. Horrez gain, LED argiak direnez kalkulatu dute gastua 1.250 euro ingurukoa izango dela.
Beharrezko segurtasun neurri guztiak hartu eta arduraz jokatzea garrantzitsua dela gogorarazi du udalak, halaber, jende pilaketak saihestuta. Halere, bereziki haurrek eta adinekoek ilusio handiz bizitzen duten garaia dela nabarmendu du udalak, “eta bi kolektibo horiek zuzenean jasaten ari dira COVID-19ari aurre egiteko hartu diren neurrien eragina”. Horregatik baliatu nahi dituzte argiak, “pertsona askorentzat hain gogorrak diren momentu hauetan kaleetara eta etxeetara poztasun pixka bat eramateko”.
