Lezoko ostalaritza laguntzeko 50.000 euro bideratzea proposatu du EH Bilduk
Proposamena gobernu taldeari helarazi diote koalizioko kideek. Diru laguntzaz gain, plan integrala behar dela uste du alderdiak.
COVID-19aren bilakaera geldiarazteko Eusko Jaurlaritzaren azken dekretuak ekarri du, besteak beste, ostalaritzako establezimenduen itxiera. Horri begira, eta premiazko neurri gisa, Lezoko EH Bilduk proposamen zehatza egin dio Lezoko udal gobernu taldeari (EAJk eta PSE-EEk osatzen dute): 50.000 euroko diru laguntza zuzena herriko ostalaritza sektorearentzat.
EH Bilduk bilera egin zuen sortu berri den Lezokoak Merkatari, Ostalari eta Zerbitzuen elkarteko hainbat kiderekin, bizi duten egoeraren berri zuzenean izateko. Bertan ateratako ondorioetako bat izan zen diru laguntza zuzenaren premia. “Jakitun gara proposatzen dugun ditu laguntza berri honek ez duela bizi duten egoera konpontzen. Plan integralagoa behar dute”, esan dute koalizioko kideek. Bizi den egoerak ostalaritza sektoreko establezimenduak kinka larrian utzi duela adierazi dute, “negozioa ixteko arriskua gertu ikusteraino”.
Lezokoak elkarteko kideekin egindako bilkuran beste hainbat gai izan zituzten hizketagai, betiere herriko komertzioa eta ostalaritza laguntze aldera begirakoak: bonu laguntzak, Lezoko taberna eta jatetxeen eskaintzaren berri emateko aplikazioa, interesik gabeko mikrokredituen aukera eta bestelakoak.
