Sei ikastetxe saritu dituzte eraginkortasun energetikoa laguntzeagatik
50/50 proiektuak Oarsoaldeko sei ikastetxe publiko saritu ditu. Ikastetxeetan egin dituzten ekintzek 22.000 euro aurreztu dizkiete eskualdeko udalei.
Karmengo Ama ikastetxeko ikasleak, eskuratutako txekea eskutan. 
50/50 proiektuak Oarsoaldeko sei ikastetxe saritu ditu, azken ikasturtean zehar eraginkortasun energetikoan izandako inplikazioagatik. Ikastetxeetan egin dituzten ekintzek 22.058,44 euro aurreztu dizkiete udalei.
Karmengo Ama Herri Ikastetxeak, Elizalde Herri Eskolak, Lezo Herri Eskolak, Cristobal Gamon Ikastetxeak saria errepikatu dute eta Bizarain Langaitz eta Koldo Mitxelena zentroek lehen aldiz jaso dute.
Eskualde mailako proiektu hau Oarsoaldeko lau udalek sustatu dute bigarren urtez eta ohiturak eta portaerak aldatzea eragiten du, energiaren pertzepzioa urruneko gaia izan beharrean, hobekuntzak egiteko tartea badagoela argi utziz.
Iniziatiba ikastetxeek urtean zehar lortutako aurrezkiaren %50 zentrora itzultzean oinarritu da, ikastetxeak zertan inbertituko duen erabaki dezan. Gainerako %50a ikastetxeetan bertan energia aurrezteko eta efizientzia hobetzeko erabiltzen du eskualdeko udal bakoitzak.
Ikasturtean zehar, ikastetxeek beraiek jarri dituzte martxan, ekipo energetiko baten bidez, kontsumoa hobetzeko jarduerak eta ekintzak, ohiturak aldatuz. Ekipo energetiko horietan eskola-komunitate osoa dago ordezkatuta: ikasleak, irakasleak, garbiketa-taldea, jantokia, atezainak eta familiak.
