2021eko Lezoko aurrekontuen proposamenaren ardatza, COVID-19aren ondorioei aurre egitea
COVID-19ari aurre egiteko diru partida zehatzik ez du aurreikusi, ordea, gobernu taldeak: "Pandemiaren bilakaeraren araberakoak izango dira".
Lezoko udal gobernu taldeak 2021erako aurrekontu proposamena landu du. Horren oinarrian, datu bat: aldunditik %15 gutxiago jasoko du 2021ean udalak, COVID-19ak eraginda sarrera gutxiago izan dituelako foru erakundeak, beraz, udalei diru gutxiago emango die. Horrela, udal gobernu taldeak adierazi du aurrekontu horren zatirik handiena COVID-19aren ondorioei aurre egiteko baliatuko duela, eta inbertsio gehienak bertan behera utziko dituela; azken horretan salbuetsita daude diru laguntzak jaso dituzten egitasmoak, tartean Altamirako igogailu berriaren proiektuaren idazketa, edota hainbat azpiegituraren konponketa.
Gobernu taldeak ez du zehaztu, ordea, zenbateko diru kopuru zehatza izango duen 2021eko aurrekontuetan COVID-19aren ondorioei aurre egiteko. “Udal diru laguntzak momentuko beharren arabera jarriko dira martxan, eta behar horiek, orain arte bezala, pandemiaren bilakaeraren araberakoak izango dira”, esan dute. Laguntza horiek kreditu globalaren eta udal gerakinen bidez finantzatzea proposatu dute. Udal laguntzei, gainera, Jaurlaritzatik edo aldunditik etor daitezkeenak gehituko zaizkiela erantsi du udal gobernu taldeak.
Herri nortasuna eta ongizatea
2021eko aurrekontuetan “herri nortasuna mantendu eta indartzearen aldeko apustu irmoa” islatuko dela nabarmendu du udal gobernu taldeak. Zentzu horretan, kirolak eta kulturak Lezoko nortasunaren ikur izaten jarraituko dutela ziurtatu du: “Ekitaldi, ikuskizun, ekimen eta jarduera guztiak mantentzearen aldeko proposamena egin dugu”, esan du gobernu taldeak, “osasun krisiak horiek aurrera eramateko aukera ematen duen heinean behintzat”.
Gainera, gizarte programa, zerbitzu, prestazio eta laguntzei bideratutako partida guztiak mantenduko direla ziurtatu du gobernu taldeak. Lezoko III. Berdintasun Plana idazteko kontu saila handitzeko konpromisoa berretsi du aldi berean, “baldin eta Emakundek diru laguntzak mantentzen baditu”.
Udal aurrekontuaren %4 Euskara Sailera bideratuko du 2021ean ere, “gure hizkuntza Lezon eta lezoarren artean sustatzen jarraitzeko, euskarak gure egunerokotasuneko hizkuntza nagusi izaten jarrai dezan”.
Enplegu Planak ere diru partida propioa izango du, Oarsoaldea Garapen Agentziaren bitartez garatzen dena, “langabezian dauden pertsonei aukera berriak eskaintzeko”.
