Euskaraldia, erakusleihorik ederrenak egiteko
Oarsoaldeko Euskara Batzordeak erakusleihoen lehiaketan parte hartzera animatu ditu Oarsoaldeko establezimenduak. Euskaraldia da gaia.
Errenteriako, Lezoko, Oiartzungo eta Pasaiako Udalek, Oarsoaldeko Euskara Zerbitzuaren bidez, Euskaraldia eta merkataritza uztartzen dituen lehiaketan parte hartzera animatu dituzte Oarsoaldeko merkatariak: Euskaraldiko Euskaparate Lehiaketa. Hala nahi duten Oarsoaldeko merkataritza, ostalaritza eta gainerako saltoki guztiek hartu ahal izango dute parte eskaparate lehiaketan. Euskaraldia hitzak nahitaez egon beharko du bistan apaintzen den saltoki edo erakusleihoan, baina hortik aurrera norberaren sormenaren eta irudimenaren arabera geratuko da.
Euskaraldiak iraun bitartean egon beharko dute apainduta erakusleihoek (azaroaren 20tik abenduaren 4ra); eskaparaterik ez izan arren, establezimendua bera, edo haren zatiren bat apainduz ere parte hartu ahal izango da lehiaketan. Baina beti Euskaraldia edota euskara aitzakia edo gai hartuta apaindu beharko dituzte dendariek euren establezimenduak.
Lehiaketan parte hartu nahi duten denda edo ostalaritza guneek Oarsoarrak-en webgunearen bitartez eman behar dute izena. Horiek ikustera joango dira izendatutako epaimahaiko kideak, Euskaraldiak irauten duen bitartean. Epaimahaiak abenduaren 15ean jakinaraziko du zein den eskualdeko irabazlea, nahiz herri bakoitzekoa. Sari nagusiaren jabeak 400 euroko bonua jasoko du bere bezeroen artean banatzeko. Herri bakoitzeko irabazleak, berriz, 200 eurokoa.
Egitasmo zabalagoa
Euskaparete lehiaketa Euskaraldiari loturik dago. Lotuta dago, era berean, urtero, urteko 365 egunetan, Oarsoaldeko lau udalek merkataritza eta ostalaritza alorrean euskararen erabilera sustatzeko gauzatzen duten Euskara Oarsoaldeko Komertziora egitasmoarekin ere. 2020tik aurrera Prezio berean, euskaraz! izena hartu duen egitasmoa, hain zuzen ere.
Era berean, antolatzaileek adierazi dute badakitela garai zaila dela egungoa merkatari eta ostalarientzat. Eta uste dute lehiaketaren bitartez eta erakusleihoak edo guneen barnealdeak apainduz, Euskaraldiari bultzada emateaz gain, bizia emango zaiela herriei, beraz, herritarren tokian-tokian kontsumitzeari.