[Galeria] Pasaia 'haurren lagun' izendatu dute, lau barrutietan seinaleak jarriz
Haur eta Nerabeen Eskubideen Nazioarteko Eguna dela eta, Unicefek duela bi urte egindako aitorpena berriro agerian jarri dute.
Karmengo Ama zentroko Gaizka eta Eider ikasleek, Izaskun Gomez alkateak, Iratxe Elso Unicefeko ordezkariak eta Pasaiako udalbatzako bozeramaileek bat egin dute bilkurarekin. 
Pasaiako Udalak seinaleak jarri ditu herriko lau barrutietan, Haur eta Nerabeen Eskubideen Nazioarteko Eguna dela eta, ‘haurren lagun den herria’ dela gogora ekartzeko.
Honako puntu hauetan ezarri dira kartelak: Trintxerpen Euskadi etorbidean; Donibanen Lezo-Bideko jolasgunean; Antxon Ibaiondoko pilotalekuan eta San Pedron frontoian.
Ekintza horrekin, Unicefeko duela bi urte egindako aitorpena berriro agerrian jarri nahi izan du Izaskun Gomez alkateak: “Haur eta nerabeen partaidetza aktiboaren aldeko apustua egiten duen herriak jasotako emaitza ere bada”. Aurkezpenarekin bat egin dute, halaber, Pasaiako udalbatzako bozeramaileek ere.
Iratxe Elso, Unicef Euskadiko ordezkariak, esker ona agertu dio herriari eta bilkurarekin bat egin duten Karmengo Ama ikastetxeko haurrei ere: “Poz handia dugu Pasaiako udalerriak Haurren Lagun den Hiriaren aitorpena baduelako, Gipuzkoako lehen herria eta bakarra baita”.
Trintxerpeko eskolako Gaizka ikasleak hartu du ondoren hitza: “Haurren laguna den herria garela aitortzea ez da guretzat amaiera bat, baizik eta hasiera bat”, bere kide Eiderrek jarraitu du “ziurtagiri honen bitartez, eskubideen alde lanean jarraitu behar dugu”.
