Oiartzuarrak gustura gelditu dira atea zulatzen
Lehen Nazional Ligako taldeak 5-0 garaitu du Arratia. Markagailuan nagusitasun osoa erakutsi arren, zelaian ez zen hainbesterako izan.
Klubak Euskaraldiarekin bat egin duela erakutsi zuten partida hasi baino lehen. Oiartzun Kirol Elkarteko emakumeen lehen taldeak garaipen polita lortu zuen larunbat arratsaldean. Arratia taldearen bisita jaso zuen Karla Lekuonan, eta partida Twitch bidez ikusteko aukera izan zutenek gozatua hartu ahal izan zuten urdinek lortutako gol festarekin.
Oiartzuarrek 5-0 irabazi arren, partida gorabeheratsua izan zen. Oiartzungo neskek ongi kudeatu zuten lehenengo zatia, eta ustez lasaitasuna eman zezakeen 2-0eko emaitzarekin joan ziren aldageletara.
Ustez, zeren igorreztarrak gogotsu atera baitziren zelaira. Bigarren zatiaren bi herenetan beraiek eraman baitzuten partidaren lema. Ez zuten oiartzuarren zorte bera izan, eta ez zuren Zorione Etxebesteren atera iritsi.
Azken ordu laurdenean norgehiagokaren kontrola oiartzuarren eskuetan egon zen, eta hiru gol sartzeko gai izan ziren. Miren Unzueta, Amaia Irastorza, Malen Moran eta Maialen Lobete —bi aldiz— izan ziren golegileak. Partida ikusi nahi duenak, hemen ikus dezake.
Euskal Ligako taldeak, berriz, pasa den asteazkenean jokatu zuen, Sestaon. 3-1 galdu zuten. Rebecca Dianak sartu zuen oiartzuarren gola.
Datorren asteburuan, partida izango duen Oiartzun Kirol Elkarteko talde bakarra izango da nesken bigarrena. Alavesen bisita jasoko dute, Ugaldetxoko zelai txikian. 12:00etan hasiko da partida.
Talde nagusia abenduaren 6ko asteburuan bueltatuko da lehiatzera.
