Herriko ekoizleen eta beren produktuen berri ikus entzunezkoen bidez zabaltzeko eskatu du EAJ-k
Landalurra azoka bertan behera gelditu da aurten pandemia egoerak derrigortuta; hori bezalako azokak dira lehen sektoreko ekoizleentzat erakusleihoa, eta azokarako bideratuta zeuden baliabideak, azokak duen helburu bereko bestelako ekintzetara bideratzea eskatu du EAJ-k.
Herriko ekoizleak, beren produktuak eta horiek eskuratzeko bideen berri ikus entzunezkoan bidez zabaltzea proposatu dio EAJk udalari. Hala jakinarazi du Elixabete Murua alderdi jeltzalearen bozeramaleak prentsa ohar bidez. Landalurra azoka bertan behera gelditu da aurten pandemia egoerak derrigortuta; hori bezalako azokak dira lehen sektoreko ekoizleentzat erakusleihoa, eta azokarako bideratuta zeuden baliabideak, azokak duen helburu bereko bestelako ekintzetara bideratzea eskatu du EAJ-k. Aldaketa klimatikoari aurre egiteko aliatu garrantzitsutzat jo du lehen sektorea, eta ezinbestekotzat jo du km0 produktuak ekoitzea eta elikadura burujabetzarantz pausuak ematea, “horretarako lehen sektore sendo bat behar dugu”.
Ingurumen zinegotziak EAJren proposamena begi onez ikusi duela azaldu du Muruak,”lehen sektoreak gure herrian duen presentzia areagotzea ezinbestekoa dela uste dugu eta horretarako beharrezkoa da erakundeetatik laguntzea, bai ekoizpenean, baita produktuak merkaturatzeko garaian ere. Bide horretan, lehen sektorea indartzeko udalak abian jartzen dituen egitasmoetan gvure erabateko lankidetza izango du”.
