Hondakin handiak eta altzariak dagokien lekuan nahi ditu udalak
Hondakina handiak eta altzariak dagokien lekuan uzteko kanpaina abiatu du udalak; isunak jarriko dizkiete Hondakinen Ordenantza urratzen dutenei.
Kanpaina berria abiatu du udalak, enegarrenez, hondakinak dagokien lekuan uzteko eskatzeko. Hondakinen gaineko sentsibilizazio eta informazio kanpaina berria abiatu du udalak. jarrera desegokiak dituzten pertsonak “konbentzitzea” da helburua Hiri Hondakin Solidoen gaikako bilketako bitartekoak erabil ditzaten. Gaur aurkeztu dute kanpaina berri hori Iztieta pasealekuan diren edukiontzien ondoan udalean ordezkaritza duten alderdi politiko guztietako ordezkariek. herritar gehienen jarrera egokia da; eta hala erakusten dute datuek. Urrian jasotako informazioaren arabera %62,8ra iritsia da hondakinen gaikako bilketa. 2017. urtean Hondakinen Udal Ordenantza onartu zutenean, %60ra iristeko ezarritako konpromisoa gainditu da, beraz. Halere, badira zuzen ari ez direnak, eta kale eta mendietan ikus daiteke jarrera arduragabe eta ez solidarioen ondorioak.
Horren adibide garbia izan da gaurko agerraldirako aukeratu duten agertokia, koltxoi bat eta galdara zahar bat zeuden edukiontzien kanpo aldean, kalean utzita. Edozein edukiontzien bueltan errepikatu daiteke irudi hori, hondakinak kalean uzten baitira, hondakin inerte eta arriskutsuz betetako poltsak, altzariak eta hondakin handiak, eraikuntza eta eraispeneko hondakinak eta obra hondakinak, kartoizko ontziak…
Gaur aurkeztu duen kanpainak, horri egin nahi dio aurre, eta hainbat elementu biltzen ditu horretarako: bando bat eta kartel bat jarriko dute atari guztietan, publizitate hesiak isun arinen zenbatekoaren berri emateko —750 euro bitartekoak izango dira— , eta araua urratzen dutenek kalean uzten dituzten hondakin handi eta altzarietan jarriko diren pegatina deigarriak.
Udalak gogora ekarri du etxez etxeko bilketa zerbitzua duela altzari eta hondakin handiak jasotzeko. telefonoz deitu behar dute herritarrek, eta hitzordu bat adostuta, bilketa zerbitzuko langileek jasoko dituzte hondakin handi horiek hurbilen dagoen puntuan. Sofak, armairuak, mahaiak, koltxoiak, somierrak, etxetresna elektrikoak… jasotzen dituzte zerbitzuaren bidez. Interesdunek 943 341 345 telefono zenbakira deitu behar dute astelehenetik ostiralera 08:00etatik 15:00etara eta hitzordua jarriko dute zerbitzuan ari diren langileekin.
Hondakinen ordenantza urratzen dutenak zigortzen jarraituko duela udalak jakinarazi dute gaurko agerraldian. Arau hauste arinek 750 euro arteko isunak eragin ditzaketela ekarri dute gogora, eta astunek, 1.5000 euro artekoak. oso astunek berriz, 3.000 euro arteko isuna jaso dezakete.
Hondakin handiak egoki kudeatzeak laguntzen duela berrerabiltzen eta birziklatzen, eta aldi berean, ingurumena errespetatzen esan dute.
20 dei egunean
Gaizki egiten dutenek ez dutela zigorrerako beste biderik uzten esan du Jose Manuel Ferradas Ingurumen zinegotziak, “zibismoa da gakoa, eta kultura hori sustatu behar dugu, ezin ditugula hondakin handiak nahi bezala eta nahi dugunean atera”. Pandemiarekin jarrera hori areagotu dela nabarmendu du gainera. Zerbitzuaren funtzionamendu egokiari ere erreparatu dio eta horren harira, datu zehatzak eman dituzte Serbitzu Elkarteko Aitor Ugartek eta Ramon Donatok, “egunero 20 deitik gora jasotzen ditugu zerbitzuan, asko informazioa eskatzeko izaten dira. Gutxi gorabehera 20 minutuero zerbitzu bat eman dugu”.
