Trenaren Plataformak elizan egingo zuen herri batzarra debekatu du udal gobernuak
Antxoko Geltoki Tren Berriaren Plataformak bihar egiteko prestatutako herri bilkura debekatu du Pasaiako Udalak, alkateak parrokoarekin hitz egin ostean.
Plataformako kideek kartelak jarri dituzte barrutian zehar, bilkura bertan behera gelditu dela iragarriz. Argazkia: Erik Salazar.
Antxoko Geltoki Tren Berriaren Plataformak iragarri du bihar (larunbata) 11:00etan San Fermin parrokian egiteko prestatuta zuten herri aurkezpena galarazi duela udal gobernuak, “ulergaitzak” zaizkien arrazoiengatik.
Taldeko kideek Hitzari adierazi diotenez, atzo (osteguna) Pasaiako alkate den Izakun Gomezek parrokoari dei egin zion herri batzarra egiteko baimena udalak eman behar zuela gogoraraziz, eraikinaren jabegoa haiena baita.
Antza denez, udalburuak adierazi du COVID-19agatik halako bilerak ezin direla antolatu. Horren aurrean, Plataformako kideek Ertzaintzak birusarekin lotutako kontsultak egiteko bereziki ahalbidetu duen zerbitzura jo zuten esandakoa egiaztatzeko, eta haiek adierazi zieten herri bilkurak antolatzeko eskubidea bazutela, betiere egoerak eskatutako segurtasun eta osasun neurriak bermatzen baziren aretoan.
Gauzak horrela, eta Pasaiako Udalak herriko elizan bilkura ospatzeko baimena galarazi dienez, herri batzarra bertan behera geldituko da behin behinean, antolatzaileek hartarako areto berri bat topatzen duten arte.
