Euskararen koloreekin zipriztinduko dute herria
Ostegunean bai, baita Euskaraldian ere, baina euskarak egunerokoan behar duela hauspoa nabarmendu du Ostolazak
Euskaraldia aurrera doa, martxa onean gainera, eta Euskararen Eguna ate joka dator, lehenengoaren datuen gaineko informazioa eta Euskararen Egunaren harira antolatutakoaren berri emateko agerraldia egin dute gaur eguerdian Maitane Aizkorreta Euskaraldiaren koordinatzaileak eta herri batzordeko kideak eta Itziar Ostolaza Hizkuntza politikako zinegotzia eta herri batzordeko kideak.
Balorazio xumea izan da egin dutena, jarduna bera amaitutakoan baloratuko baitute Euskaraldiaren eragina, baina datuen berri ematea ezinbestekotzat jo dute, “behintzat izena eman dugunok jakin dezagun gure herrian zenbatek eman dugun izena, zenbat entitate ari den aktiboki parte hartzen, eta zenbat arigune ditugun”.
Pandemia gogor jotzen ari bada ere Errenteriarrek gogotsu heldu diotela Euskaraldiari esan dute Ostolazak eta Aizkorretak, azken horrek eman ditu datu zehatzak: 2.103 herritarrek eman dute izena parte hartzeko euskararen aldeko ariketa erraldoian, “pasa den ekitaldiarekin alderatuta 600 lagun gutxiago dira. Ikusita zein urte tokatu zaigun, kopuru polita dela uste dugu. Euskal Herri osoan hala izan da, proportzionalki jaitsi da”. Entitateei erreparatu die Aizkorretak, izan ere, Euskaraldian Errenteria-Oreretako 54 entitate ari dira parte hartzen, eta 225 arigune sortu dira.
Izena eman dutenen artetik, gehienak, Ahobiziak gehiengoa, Belarripresten kopurua hirukoiztuta: 1.602 Ahobizi rolean eta 501 Belarriprest rolean eman dute izena. Egoerak ez du lagundu, baina euskararen aldeko konpromisoa hartu dute herritarrek.
Euskararen Egunari begira berriz, kale ekintzarik ez antolatzea aurten pandemiaren testuinguruan erabaki du herri batzordeak, horren ordez, kaleak kolorez beteko dituztela azaldu du Ostolazak: “Balkoi eta leihoen izpiritua berreskuratuta euskararen printzekin herria koloreztatzera deitu nahi ditugu herritarrak. Euskarari omenaldia egiteko, kaleak argiztatuko ditugu Euskaraldiaren koloreekin”.
19:00etan egin dute hitzordua, ostegunean, Abenduaren 3a, Euskararen Eguna. Agertokia, esan moduan, etxeetako balkoi eta leihoak. Herria koloreztatzeko, berriz, tolesterakoan argia egiten duten makiltxoak banatuko dituzte Lau Haizetararen egoitzan eta Merkatuzarren hilaren 3an bertan 17:00etatik 18:30era. Ikastetxe, euskaltegi zein udal ekipamenduetan ere banatuko dituzte. Helburua, horiek astintzea eta kaleak kolorez betetzea, baina batez ere euskaraz betetzea bazterrak. Horren harira, ostegunean bai, baita Euskaraldian ere, baina euskarak egunerokoan behar duela hauspoa nabarmendu du Ostolazak, egunero erabiltzeak ekidingo baitu euskararen koloreak zimeltzea, etengabe mihiak euskaraz astintzeak arigune erraldoi bilakatuko duelako herria.
Osteguneko ekitaldia ikusgarri egiteko, argazkiak eta bideoak atera eta e-postaz bidaltzeko eskatu dute. Sare sozialetan banatuz gero, berriz, @euskaraldiaerrenteria aipatu eta #700baietz traola erabiltzeko eskatu dute.