Galtzaraborda eta Alaberga arteko oinezko irisgarritasuna hobetu dute
Alaberga baserriaren ondoan eraiki dituzten 30 etxebizitza eta garajeko eraikin berriari lotuta urbanizazio osagarrirako lanen barruan zegoen aurreikusia eremu hori sortzea, eta dagoeneko zabalik dago.
Alabergako ibarra. Argazkia: Errenteriako Udala Oinezkoentzako ibilbidea sortu dute Alabergako ibarrean. Alaberga baserriaren ondoan eraiki dituzten 30 etxebizitza eta garajeko eraikin berriari lotuta urbanizazio osagarrirako lanen barruan zegoen aurreikusia eremu hori sortzea, eta dagoeneko zabalik dago.
Udalak jakinarazi duenez, oinezko ibilbide horri esker, Galtzaraborda eta Alaberga auzoen arteko irisgarritasuna eta lotura hobetu da. Zehazki, hegoaldean, topoaren bidearen mugakide diren mendi hegaletako lurretan, Aiako Harria kaletik eta udal kiroldegitik Parke eta Urdaburu kaleetarako irisgarritasuna hobetzeko pasealeku bat egin da. Iparraldean, berriz, Irumugarrieta kalearen paraleloan, etxeetara sartzeko espaloi berriari baserriaren atzetik eman diote segida Urdaburu kalearekin bat egin arte, oinezkoentzako ibilbide atseginagoa sortuz.
