Donibaneko memoria historikoa balioesteko proiektua jarri dute martxan
'Sanjuandarren oroimena' proiektuaren baitan, 70. hamarkadako argazkiz osaturiko egutegia eta hildako bizilagunak omentzeko erakusketa prestatu dituzte.
Pasai Donibaneko Ubera liburutegiko Bibliotekaren Lagunak taldeak 'Sanjuandarren oroimena' jarri du martxan. 
Pasai Donibaneko Ubera liburutegiko Bibliotekaren Lagunak taldea ‘Sanjuandarren oroimena’ proiektua garatzen ari da, Pasai Donibaneko memoria eta historia gogora ekartzeko xedez.
Helburu horrekin, Udalaren Euskara Sailaren laguntzaz, taldeak egutegi bat osatu du, Gordon Beld eta Antxon Basurkok 70. hamakadan egindako argazkiez osaturikoa. Horren banaketa Uberan bertan egingo da, hilaren 11tik aurrera.
Horrez gain, erakusketa txiki bat ere antolatu dute Urduñako Frontean hildako sanjuandarren omenez, 1936ko abenduaren 11n bost sanjuandarrek bizitza galdu baitzuten frontean izandako borroken ondorioz: Julio Alzua Goikoetxea, Luis Basurko Agirregomezkorta, Generoso Laboa Sistiaga, Francisco Prieto Puertas eta Pedro Segurola Egia.
