"Huts egin diguzue, baina gure frustrazioa errebeldia bihurtzen jarraituko dugu"
Haserre daude emakume pentsiodun eta adinekoak. 'Toledoko Itunaren murrizketei ez!' lelopean manifestaziora deitu du Duintasunak.
Haserre daude emakume pentsiodun eta adinekoak. Toledoko Itunaren gomendioak behin eta berriro irakurtzen ari dira, lerro artean euren baldintzak etorkizun hurbilean hobera egingo duten itxaropen txiki bat emango dien zerbait aurkitzeko, baina lerro bakoitzarekin etsipena eta haserrea areagotu egiten zaiela esan dute. Gauzak horrela, kalea hartuko dute, enegarrenez, pentsio eta zahartzaro duin bat aldarrikatzeko. Pentsiodunen mugimenduak, mobilizazio bateratua deitu du, baina ezingo denez hiriburuetan zentralizatu, haserrea eta ahotsa bazter guztietatik entzuteko modua aurkitu dute.
Errenteria-Oreretan, manifestaziora deitu dute hilaren 5ean, larunbatarekin. Toledoko Itunaren murrizketei ez! lelopean, 12:00etan abiatuko da Zumarditik.
Agintariei beste behin ere “bakarrik uztea” egotzi diete emakume pentsiodun eta adinekoek, “babesgabetasunean eta pobrezia egoeran. Genero arrakala ezabatzeko neurriak hartu dituzuela esanez ahoa betetzen bazaizue ere, badirudi betetzeko materialak ahaztu zaizkizuela; zubi txikiak egiteko ohol txikirik ere ez duzue ekarri”.
gaur egun pentsiodunak diren emakumeek, miseria pentsioak dituzten gehienek ez dutela egoera hobetuko salatu dute, “eta etorkizuneko pentsiodunek egiaztatuko dute beren pentsio publikoak ez direla ongintza laguntza miserableak baino izango”. Emakumeen lana, ordaindua zein ordaindu gabekoa funtsezkoa dela defendatu dute, “eta oraindik ere hala da gizarte honi eusteko. Agintari jaun andreak, huts egin diguzue, baina gure frustrazioa errebeldia bihurtzen jarraituko dugu”.
Herritarrei mezu argia eta eskaera zehatza: “hilaren 5ean kaleak eta plazak betetzera atera behar dugu”.
