Ostiralean piztuko dituzte Gabonetako argiak Lezon
Gabonak bukatu bitartean 17:30ean piztuko dira, egunero. Herrian erosketak egin ditzatela eskatu die udalak lezoarrei.
Iazko Gabonetan, argiteria martxan plazan. Ostiralean piztuko dituzte Lezon Gabonetako argiak. Kaleko argiteria piztearekin batera, berezi hori ere argituko da, 17:30ean. Eguberriak bukatu arte piztuko dituzte, egunero ordu horretan. Itxaropenerako mezua zabaldu nahi izan du udalak era berean: “Etxe askotan ospakizunetarako arrazoi handirik izango ez bada ere, garrantzitsua da ilusioari eustea, haurrei merezi dituzten Gabonak ematea eta, batez ere, esperantzari ateak ez ixtea. Elkarrekin krisi honi aurre egiteko gai garela sinistea beharrezkoa izango delako hori egi bilakatzeko”.
Lezoko Udalak nabarmendu du kaleko giroa alaitzea dela argiteria jartzearen arrazoia. Tokiko dendetan erostea bultzatu nahi du udalak. “2020 urtea zaila izaten ari da guztiontzat, baina badira bereziki kaltetuak izaten ari diren sektore batzuk, besteak beste, tokiko merkataritza”, adierazi dute udaletik. Izan ere, udala sinetsita dago argiek kaleei bizia emango dietela, honenbestez, herritarrek herrian erosketak egiteko aldarte hobea izango dutela.
Horregatik, udalak dei egin die herritarrei herriko komertzioa bultza dezatela bertan kontsumituz. “Har dezagun guztiok konpromiso hori eta zaindu dezagun gure merkataritza”, esan du Jesus Mari Martiarena alkateak.
