Pasaiako Udalak euskaraz egin nahi dio aurre mundu mailako krisiari
Euskararen Nazioarteko Eguna tarteko (hilak 3), udalbatzako bozeramaileek euskara aurrerabide iritzi dute: "Euskaraz biziberritu behar dugulako gizartea".
Pasaiako Udalak Euskararen Nazioarteko Eguna dela medio, hizkuntzarekiko konpromisoa berretsi du. 
Bihar (hilak 3) da Euskararen Nazioarteko Eguna, eta data hori dela kausa, Pasaiako Udalean ordezkaritza duten talde politikoetako bozeramaileek Euskal Herriko hizkuntza “aurrerabide” iritzi dute adostutako adierazpen batean.
Aurrekaririk gabeko osasun larrialdiak agerian utziriko zaurgarritasuna euskaraz sendatzeko konpromisoa berretsi dute udalbatzako kideek: “Euskaraz egin behar diogu aurre mundu mailako krisiari; euskaraz egin behar dugu ilunpetik argira eramango gaituen bidea”.
Euskaraldia, askabide
Horren aritik, aipamen berezia egin nahi izan diote aurtengo Euskaraldiari, “aurten berriz ere zailtasunak aukera bilakatzeko abagunea” eskaini izanagatik, “krisia aukera bihurtzeko lanabesa”. Izan ere, euskararen aldiak esanahi apartekoa dauka testuinguru honetan, krisiari aurre egiteko erabakia euskaraz egin baitute askok eta askok.
Pasaian, zehazki, 1735 herritarrek eta 100dik gora entitatek eman dute izena eta hartu dute parte hizkuntza ohiturak aldatzeko praktika sozialean, eta horrek, zalantzarik ez da, bere kabuz hitz egiten du: “Aurten beste zerbait ikasi dugu: egoera zailetatik ateratzeko eginahalean lagungarri dugula euskara, bidelagun ezinbestekoa”.
“Euskaraz biziberritu behar dugulako geure gizartea.
Euskararen ahotsa zor diogulako munduari.
Euskaraz garelako munduko herritar.
Euskara aurrerabidea delako”.
