2018ko udan portuan erre zen txatarra bertatik kentzen hasi dira
Eguzkik nabarmendu du oraindik ez dagoela sutearen gaineko datu zehatzik: "Ez dugu sute haren kausen eta ondorioei buruzko informazioa".
Argazkia: Eguzki. Eguzki Talde Ekologista eta Antinuklearrak eman du berria. 2018ko abuztuaren 2an portuan erre zen txatarra garraiatzen hasi direla jakinarazi du taldeak. Antza, erre zena bertan izan da orain arte, “epailearen aginduz-edo” Eguzkik adierazi duenez. Harago doa taldea: sute hura zerk eragin zuen eta ondorioei buruzko informazio zehatzik ez dagoela adierazi dute, “eta batez ere ez dugu horrelako zerbait berriro gertatuko ez den inolako bermerik, ordutik, ezer gutxi aldatu delako”.
Gaiaz hainbat aurrekari eman ditu Eguzkik. 2018ko abuztuaren 2 hartan sutea piztu zen Lezoko moilan zegoen txatarran. Ke zutabe handia eragin zuen horrek, “toxikoa” Eguzkik esan duenez. Oarsoaldean bakarrik ez, ondoko eskualdeetan ere ikusi ahal izan zen ke beltza. Badia inguruko herrietako bizilagunei, nahiz Donostiako Mirakruz eta Ulia aldekoei, leihoak ixteko aholkua eman zieten Segurtasun Sailak eta Osasun Sailak. “Airearen kalitatea behatzeko Lezon dagoen estazioak onartutako gehienezko PM10 partikulen kopurua hirukoiztu egin zen”, zehaztu du Eguzkik.
Ondorengo egunetan Portu Agintaritzak nahiz Eusko Jaurlaritzak lasaitasun mezuak zabaldu zituzten. Sutearen arrazoia tenperatura altuak izan zirela argudiatu zuten, “ustekabeko sutea izan zela”, dio Eguzkik. Aldi berean, gertakari horietarako protokoloa egoki bete zela esan zuten erakundeetako ordezkariek, eta sutea itzaltzeko urak (badiara bota zuten) ez zuela eraginik izango ez herritarren osasunean ez ingurunean.
Alta, herritarrak antolatu, eta erantzukizunak eskatzeko bidea abiatu zuten agerraldi eta mobilizazio bidez. Badian Bizi plataforma sortu zuten. Taldeak fiskaltzari eskatu zion gaia ikertzeko (aurretik ofizioz hasia zuen ikerketa), baina eskaera idatzia ez zuen jaso, “beharrezkoa ez zela argudiatuta, ikerketa martxan zegoelako”. Donostiako 3. Instrukzio Epaitegiak behin-behineko diligentziak ireki zituen. “Baina geroztik ez dugu ezer jakin”, nabarmendu du Eguzkik.
