Xabier Lete gogoan izango duten hainbat ekitaldi egingo dituzte asteburuan
Gaur bete dira hamar urte poeta eta abeslaria hil zela. Asteburu osoan zehar berari buruzko ikus-entzunezkoak emango dituzte Arizmendi-enean.
Gaur bete dira hamar urte Xabier Lete poeta eta abeslaria hil zela. Bere omenez antolatutako hainbat ekitaldi egongo dira asteburuan zehar.
Gaur, bihar eta etzi Leteri buruzko ikus-entzunezkoak emango dituzte Arizmendi-enea etxean, udalak antolatuta. Zortzi orduko muntaketa prestatuta dute: 11:00etatik 13:00etara, eta 17:00etatik 20:00etara ikusi ahal izango dira.
Arratsalderako, berriz, prosa eta poesia lehiaketaren XXXIII. ekitaldiko sariak banatuko dituzte parrokian, 17:00etan hasita. Iaz jarri zioten Leteren izena, eta 2018tik kointziditzen du Leteren heriotzaren egunarekin.
Bihar goiz-eguerdirako pare bat ekitaldi antolatu dituzte. Lehenengoa, Hitzen Lihoa iniziatibak antolatutako Xabier Leten barrena ibilbide biografikoa egingo dute Elizaldeko kaskotik, Leteren hainbat txoko ezagutarazteko. Izena emateko, e-posta bidez idatzita edo 943 49 45 21 telefono zenbakira deituta (hurrengo asteburuan ere egingo dute; hilaren 13an).
Azkenik, bihar, 13:00etan, Oiartzungo Udalak ekitaldi instituzional bat egingo du Arizmendi-enean.
Datorren asteburuari begira, ibilbide biografikoaz gain, Loreak eta zauriak emanaldia eskainiko dute Elorsoro kiroldegiko kantxan. Sarrerak salgai daude Urrats paper dendan.
