[Bideoa eta galeria] Toledoko Itunaren berrikusteak pentsiodunak haserretu ditu
Duintasuna Oarsoaldeko erretiratuen elkarteak deituta, manifestazioa egin dute Errenteria-Oreretan Toledoko Itunaren azken neurriak salatzeko.
Toledoko Itunaren barruan hartu diren aholku eta erabakiek ez dituzte pozik utzi erretiratuak. Ez behintzat Duintasuna Oarsoaldeko erretiratuen elkarteko kideak. Horien kontra egiteko manifestazioa egin dute gaur Errenteria-Oreretan. Aurrean eguraldi makurra izanagatik ere, ez dira izutu eskualdeko pentsiodunak nahiz martxan parte hartu dutenak. Oarsoaldean bezala, Euskal Herriko hiriburu eta herrietan egin dituzte mobilizazioak erretiratuek.
Duintasunaren ustez, Toledoko Itunaren gomendioak agerian utzi dute “gezur handia” dela segurantza publikoa defendaezina dela. Era berean, salatu dute pentsioen igoera KPIarekin lotuta egongo dela, “horrek desabantaila asko dakartza pentsiodunentzat”.
Hala, azken erabakiek murrizketen bidea berretsi dutela uste dute erretiratuek, eta ez dutela bermatzen 1.080 euroko gutxieneko pentsioa. Gainera, emakume pentsiodunen egoerak okerrera egingo duela ziurtatu dute, genero arrakala handituz: “Emakumeek funtsezko eta ezinbesteko zereginak betetzen jarraitzen dute, bizitzari, gizarteari eta jarduera ekonomikoari berari eusteko”.
Toledoko Itunaren berrikuspenak pentsio funtsak sustatzeko balioko duela nabarmendu dute, “diru sarrera handienak dituztenei mesede eginez, zerga desgrabazioekin, zergadun guztien diruarekin». Pentsio funtsena erreformaren alderdirik arriskutsuena dela diote: “Lanaren, soldataren, pentsioen kontzeptu errealak, funtsen, kapital errenten eta burtsa espekulazioaren kontrakoak dira”.
Hartara, erreformak berriki erretiratuko direnei kalte egingo diela salatu dute Duintasunakoek: “Oraingo ekarpen urte berekin, pentsio baxuagoa izango dute”. Eta hala, egun pentsio prekarioak badaude ere, aurrerantzean horiek are ezegonkorragoak izango direla adierazi dute
