Elkarrekin Errenteria:"Aldarrikapenak errespetatzen ditugu, baina modu guztiek ez dute balio"
Elkarrekin Podemos-IU Errenteriak, kezka azaldu du komunikabideetara helarazitako prentsa ohar bidez. Joan den larunbatean, hainbat pertsona eskailera baliatuta udaletxeko balkoira igo zirela pankarta bat zintzilikatzera esan du idatzi horretan.
Errenteriako udaletxea, artxibo irudi batean. Elkarrekin Podemos-IU Errenteriak, kezka azaldu du komunikabideetara helarazitako prentsa ohar bidez. Joan den larunbatean, hainbat pertsona eskailera baliatuta udaletxeko balkoira igo zirela pankarta bat zintzilikatzera esan du idatzi horretan, “ekintza hori udalaren baimenik gabe egin zuten”. Aldarrikapen politikoa errespetatzen dutela, baina hori egiteko askotariko moduak daudela esan dute, “eta pertsona talde horrek aukeratutakoa egokiena izatetik urrun dago. Grabatu eta ondoren sare sozialetan elkarbanatu zituzten irudiak Errenterian zorionez gaindituta ditugun garaietara itzularazi ziguten”.
Pankarta balkoian zintzilikatuta, komunitate gisa egiten ari diren elkarbizitzarako lana ez dutela indartu gaineratu du alderdi moreak, eta galdetu ea beharrezkoa zen “egindako eszenaratzea”. Alderdiak ezin duela bestaldera begiratu, “ezta igandean gertatutakoa konpartitu” gaineratu du.
Errenteriako Udala askotariko aldarrikapen politiko eta sozialak eztabaidatzera irekita dagoela nabarmendu du Elkarrekin Podemosek, “gure alderdiak edozein mozio babestuko du eztabaidatua izan dadin, beti ere, giza eskubideak errespetatzen baditu, nahiz eta gero kontra bozkatu. Udal balkoian enblema eta skotariko pankartak jartzea babestu dugu, uste dugulako oinarrizko zerbitzuak bermatzeaz gain, udal jardunak ezin duela ez entzunarena egin gure gizartean sortzen diren gai soziopolitikoen aurrean”.
Horregatik iruditzen zaiela onartezina pankarta horrela jarri izana erantsi dute, “zin dugu onartu hau aurrekari bihurtzea. Logika bera erabilita edozeinek izan dezake eskubidea udaletxeko balkoira igo eta aldarrikapena zintzilikatzeko. Gertatutakoa gaizki dago, egiten duena egiten duela. Horregatik berriro ez gertatzea espero dugu, inoiz gertatu behar ez zuena”.
