Lezoko Euskal Liburu Azoka, hilaren 14tik 19ra
Azoka Kultur Aretoan izango da, eta aforoa mugatua izango den arren, hara joateko ez da aldez aurretik erreserba egin behar.
Aurtengo Euskal Liburu Azoka aurkeztu zuten atzo Lezoko Udalak eta kultur eragileek. Iazko eredua jarraituta, aurtengo edizioaren berezitasunak azaldu zituzten Ion Pombar Kultura zinegotziak, Edurne Lizarazuk eta Jon Legorburuk, azken hauek kultur eragileen izenean. Azoka Jai Batzordeak antolatu du, Lezoko Udalarekin elkarlanean.
Azokaren helburu nagusia euskal literatura eta kultura, eta honekin batera irakurzaletasuna, sustatzea dela gogoarazi zuen Legorburuk aurkezpenean. Bestetik, Ion Pombarrek aipamen berezia egin nahi izan zuen sektorea jasaten ari den egoera gogorragatik. Herritarrak deitu zituen azoka babestera, modu horretan “krisialdi honek kolpatu dituen herritar eta eragileei laguntza eskaintzeko”.
Hirurek bat egin zuten azoka mantentzeko egin diren ahalegin guztiak baloratzeko garaian, Gabon berezi hauetan “inoiz baino gehiago” beharrezkoa delako kulturarekiko egin duten apustuari heltzea.
Euskal literatura alde batera utzita, bezeroek beste hainbat produktu topatu ahal izango dituzte azokan, esaterako euskarazko jolas didaktikoak edo Lezoko elkarteen produktuak. Modu horretan, azoka “osatzea” bilatzen zutela jakinarazi zuten kultur eragileek.
Pandemia dela eta, aurten erosketak online egiteko aukera zabaldu dute azokaren arduradunek. Hontza liburu dendaren plataforma erabiliko dute horretarako, eta produktuen bilketa Lezoko Kultur Aretoan izango da.
Azokak astebeteko iraupena izango du, hain zuzen ere hilaren 14tik 19ra, eta goizez zein arratsaldez egongo da irekita, azken egunean izan ezik, soilik goizez egongo dela bertaratzeko aukera. Goizean 11:00tatik 13:00tara egingo da salmenta, eta arratsaldez 17:00tatik 19:00tara. Lezoko Kultur Aretoan da, eta aforoa mugatua izango da. Hala ere, ez da beharrezkoa izango izena aldez aurretik ematea edo erreserba egitea.
Liburu bonua
Aurten mantenduko den beste iniziatiba bat liburu bonuena izango da. Iaz harrera oso ona izan zutela jakinarazi zuten asteazkeneko agerraldian azokaren arduradunek, eta hori dela-eta mantentzea erabaki dute.
Bonuekin, gutxienez 20 euroko erosketa egiteagatik, sei euroko deskontua eskuratu ahal izango dute azokarekin bat egiten dutenek.