Joanes Larretxea etxera dezaten bidea izango dira hilaren 27an
Doneztebe plazan jarriko dituzten makina estatikoetan oinez, korrika, bizikletan edota arraunean kilometroak pilatzera gonbidatu ditu Sarek oiartzuarrak.
Sare Oiartzunek hilaren 27rako antolatutako erronkaren nondik norakoak azaldu ditu. Sare Oiartzunek Joanes Larretxea euskal presoa etxeratzeko ekitaldia antolatu du hilaren 27rako, Izan Bidea dinamikaren baitan. Aurtengo Gabonetan kirol proba herrikoirik egingo ez dela eta, bidea izatera gonbidatu ditu taldeak oiartzuarrak, oinez, korrika, bizikletan zein arraunean. Herritarrak parte hartzera anima daitezen argazkia atera dute gaur eguerdian Doneztebe plazan hainbat arraunlarik, txirrindularik, korrikalarik eta oinezkok.
Zabaldutako informazioaren arabera, ergometroa, bizikleta estatikoa eta korrika egiteko zinta jarriko dituzte bertan hilaren 27an. Herritarrek kirol makina bat aukeratu beharko dute aurretik, eta 15 minutuko txandetan, norbera bere erritmoan, kilometroak pilatzen joango da.
Larretxea etxeratzeko adina kilometro egitea da Oiartzungo Sarek proposatutako erronka. Orain gutxi jakinarazi zuen Espainiako Espetxe Erakundeak Herrera de la Manchatik (Ciudad Real, Espainia) Asturiasko (Espainia) Villabona espetxera lekualdatuko zuela preso oiartzuarra; herritik 397 kilometrora, hain zuzen.
Hori horrela, izena emateko interesa duten lagunek Elorsoro kiroldegian egin beharko dute, baita kirol makina aukeratu eta txanda hartu ere. Goizeko 10:00etatik iluntzeko 20:00ak bitartean garatuko da erronka, Sarek zehaztu duenez.
