[Galeria] Oarso Bidasoko ostalari gehienek pertsianak igo dituzte berriro
Ezberdintasun nabariak antzeman ditu HITZA-k Errenteria-Orereta, Oiartzun eta Hondarribiaren artean; azken honetan, momentuz, ateak ez zabaltzea erabaki dute ostalari askok.
Koronabirusaren bigarren olatua eteteko helburuarekin Eusko Jaurlaritzak azaroaren 6an ezarritako neurriak medio, hilabete pasatxoz itxita egon da ostalaritza. Aste honetan, ordea, taberna eta jatetxeei agindutako itxialdia gaur altxatuko zuela iragarri zuen Iñigo Urkullu lehendakariak prentsa aurrean egindako agerraldian. Hala, etxeratze agindua indarrean mantendu arren, gaurtik eta egunean zehar, pertsiana igotzeko baimena jaso dute ostalariek.
Oarso Bidasoan irekierari heldu diete, berriz ere, sektoreko profesional gehienek, nahiz eta herriz herri ezberdintasun nabariak antzeman dituen HITZA-k. Errenteria-Oreretako, Oiartzungo eta Hondarribiko kaleak bisitatu ondoren, hamarnaka ostalarik itxita jarraitzea erabaki dutela ikus daiteke. Joera hori are begien bistakoagoa izan da Hondarribiko San Pedro kalean, non tabernen erdiak ere ez dituzte ateak ireki.
Ostalariek pixkanaka normaltasunerantz urratsak egiterik duten ikusteko dago orain; are gehiago, agintariak hirugarren olatuaz mintzo direnean dagoeneko. Gaurkoan, momentuz, bezero gutxi ikus zitekeen tabernetan.
Ondokoak dira Errenteria-Oreretan, Oiartzunen eta Hondarribian bildutako irudi sorta: