Oarsoaldea bera ere oparien zakuan sar daitekeelako
Oarsoaldea Garapen Agentziak egun hauetan egin daitezkeen hainbat aisia jarduera gogorarazi ditu: museoen bisita, gastronomia, ostatu hartu...
Hurbil dira Gabonak, eta egungo gizartean hori oparien sinonimo da. Oarsoaldea Garapen Agentziak eskualdeko eskaintza gogorarazi du, burua eragiteko nagia dutenentzat.
“Gure eskualdeko baliabideak konbinatuz opari borobilak sor ditzakegu, egoerak hobera egitean gozatu ahal izateko: ostatuak, museoak, esperientziak, gastronomia…”, adierazi dute. Opari horiek alorka sailkatu dituzte.
Museoen bonua
Eskualdeko museoak urte beteko epean bisitatzeko sarrera Errenteria-Oreretako turismo bulegoan edo museotan bertan eskura daitezke, 12,50 euroren truke. Honakoak dira bonu horren barruan sartzen diren sei zentroak:
- Arditurri meategiak (Oiartzun).
- Luberri Ikasgune Geologikoa (Oiartzun).
- Soinuenea-Herri Musikaren Txokoa (Oiartzun).
- Jantziaren Zentroa (Errenteria-Orereta).
- Mater Ontzi Museo Ekoaktiboa (Pasaia).
- Albaola Itsas Kultur Faktoria (Pasaia).
Esperientzia gastronomikoak
Gastronomiarekin zerikusia duten hainbat tailer edota dastaketa proposatu dituzte Oarsoaldeakoek. Honako bost hauek dira:
- Sukaldaritza tradizionala tailerra (Ziaboga jatetxea, Pasai Donibane) .
- Txokolate tailerra (Casa Aramendia, Errenteria-Orereta).
- Artisau antxoa kontserba tailerra (Mater ontzian, Pasaia).
- Dastatze bisita ahate produktuen baserrian (Momotegi baserria, Oiartzun).
- Artisau garagardoen dastatzea eta bisita gidatua (Pagoa garagardotegia, Oiartzun).
Aisia jarduerak, oro har
Aisiarekin gozatzeko hainbat aukeraren berri badela gogorarazi dute, modu ezberdinean aritzeko.
- Lucretia belaontzi klasikoan bidaia.
- Urpekaritza bataioa.
- Zaldi ibilaldiak naturan.
- Oiartzungo termetara sarrera.
- Piragua eta paddle surf alokairua.
- Itsasontzien alokairua.
Oarsoaldea Turismoaren webgunean lor daiteke informazio gehiago.
Jan eta lo
“Opariak borobiltzeko aukera ugari ditugu eskualdean: jatetxe batean otordua eta, zergatik ez, eskualdean ostatu hartzea”, iradoki du Oarsoaldea Garapen Agentziak.
Eskualdeko eskaintza gastronomiko askotarikoaren berri ematen dute beren webgunean.
Informazio gehiago behar izanez gero, Oarsoaldeko turismo bulegotik pasa daiteke. Errenteria-Oreretan dago, Madalen kaleko aldaparen hasieran. Telefonoz —943 49 45 21— edo e-posta bidez ere jar daiteke harremanetan.