Flauta Taldeak udalaren esku utzi ditu azken 30 urteetako partituren moldaketak
Hiru hamarkadatan jo dituzten 275 partitura utzi dizkiote dohaintzan udal erakundeari. Estilo eta zailtasun mota guztietako piezak daude.
Cousillas, Gurrutxaga eta Saizar, partiturekin.
Oiartzungo Flauta Taldeak udalari dohaintzan utzi dizkio azken hiru hamarkadetan kontzertuetarako moldatu dituen 275 partitura. Iñaki Gurrutxaga zuzendariak eta Edurne Saizar musikariak eskura eman diote Iosune Cousillas Kultura zinegotziari.
Musika estilo askotako partiturak daude: gabon-kantak, euskal musika, jazz partiturak, Afrikako musika; Artzain eta Inudeetan jotako piezak…
Zailtasun mota askotakoak ere badaude, oinarrizkoenetatik hasi eta zailenetaraino. Gurrutxagak esan duenez, “pozik” dago udalak jaso dituelako. Hartara, dohaintzak aukera gehiago eman dezake partitura horiek erabiltzeko.
Cousillasek, bere aldetik, eskerrak eman dizkio Oiartzungo Flauta Taldeari. Udalak partitura hauek edozein musikari, musika-irakasle, flauta-talde eta herritarren eskura jarriko ditu, Kultura sailaren bidez. Momentuz, partitura fisikoak udal artxiboan jasoko dituzte baina aurrerago, digitalki ere eskuragarri jartzea da asmoa.
